Улсын бүртгэлийн ерөнхий газраас “Гуравдугаар сарын 1-нээс үндэсний энгийн паспортын шинэ загвар болон цахим гадаад паспортыг хэрэглээнд нэвтрүүлнэ” хэмээн мэдээлсэн. Энэ дагуу хэрвээ гадаад паспортын хүчинтэй хугацаа дууссан бол хоёр төрлийн паспортаас иргэд сонголтоо хийж захиалж байгаа аж.
Монгол Улс анх удаа өөрсдөө хэвлэж байгаа гэх 42 хуудастай гадаад паспорт дээр үндэсний бахархалт зүйлсээ тодруулан хэвлэсэн гэж байв. Тэгвэл гадаад паспорт дээр хэвлэсэн үндэсний бахархалт шонхор шувууны зураг нь алдаатай байсан талаар шувуу судлаачид анхааруулав.
Монголын шувуу судлалын нийгэмлэгийн судлаач С.Гомбобаатар” Монгол хүнийг гадаад болон дотоодод төлөөлөх цөөн хэдэн баримтын нэг бол гадаад паспорт мөн. Үүнд ямар нэгэн алдаа мадаг байх ёсгүйг бид анхаарах нь зүйтэй. Шинээр гарсан гадаад паспортын арын хуудас дээр махчин шувууны зургийг дүрслэн үзүүлжээ. Махчин шувууны зураг байх нь маргаад байх зүйл биш. Өнөөдрийн бидний, бидний өвөг дээдсийн бахархал болсон хурмастын амьтан жигүүртний бэлгэдэл байх нь зүйтэй гэж хувь хүний хувьд боддог
Гадаад паспортын арын хуудас дээрх махчин шувууны дүрслэлийн хувьд мэргэжлийн хүний хувьд хэдэн зүйл хэлье.
Гадаад ерөнхий төрх, нүцгэн шилбэний урт, залуур өдний хөндлөн судал, нурууны судал, толбо, далавч болон сүүлний харьцаа, хошууны хэлбэр буюу хошуундаа шүдлэггүй, сүүлний доод даруул зэргийг харгалзвал харцага юм. Гэтэл шонхорт голчлон илэрдэг сахал өдийг нүднээс доош унжуулан зурсан нь бүр ойлгомжгүй болгов. Тэгэхээр шонхор, харцагын “эрлийз” бодгалийн шинж бүхий зураг болжээ. Гүеэ, цээжний дээд хэсгийн шулуун судал, цээжний болон хэвлийн хөндлөн судлыг харгалзвал энэ нь залуу шувуу ажээ. Миний бие Зүүн Өмнөд Азийн махчин шувууны номыг 20 гаруй орны эрдэмтэдтэй хамтран гаргасан хүний хувьд Зүүн Өмнөд Азид байдаг харцагуудыг гадарлана. Согсоот харцагa (Accipiter trivirgatius)-ын ерөнхий шинж байгаа ч хоолой доор байдаг бараан судалгүй юм. Нангиад харцага (Accipiter soloensis), Бэсрэг харцгага (A.virgatus)-тай ч дүйхээргүй болжээ. Хамгийн ойртож очих нь манай орны морин (A.nisus) болон үлэг (A.gentilis) харцага бөгөөд толгойн дүрслэл, цээжний судал үнэндээ энэ хоёр руу бас л дөтлөхгүй болсон. Иймээс энэ шувууны зүйлийн нэр, нас, хүйсийг шувуу хальт гадарладаг хүний хувьд би лав хэлж мэдэхгүй. Шувууны зүйл, нас, хүйсний шинжийг гаргаагүй дүрслэлийн алдаатай зураг болжээ гэж дүгнэхээр байна. Энэ бүлгийн шувууд хад цохио дээр суух нь тун ховор. Зөвхөн нүүдлийн үедээ эцэж, ядарсан шувууд л сууж буй нь үзэгдэнэ. Иймээс сууж буй обьект нь ч бодит амьдралаас хол юм шиг санагдлаа. Иймээс энэ дүрслэлийг бид паспорт дээрээ тавих “хэрэггүй” байх. Ийм энгийн зүйлийг зөвлөж чадахгүй шувуу судлаачидтай байна уу гэдэг нь асуулт гарах байх. Зарим мэргэжлийн хүмүүс зөвлөсөн байлгүй. Гэхдээ тэд шувуу судлаач гэж өөрсдийгөө дөвийлгөсөн “би чадна” байж магад. Төрийн хар хайрцаг, бэлгэдэл, бодлогын зөвлөмжийг төрийн өмчийн их, дээд сургуулийн мэргэжлийн хүмүүсээс авч байх нь зүйтэй.
За даа ийм алдаа мадаг гарчээ. Ажил хийж, бүтээж буй хүн бүрт алдаа мадаг гарна. Мэргэжлийн хүмүүсийн үг, санаа, зөвлөмжийг сонсох нь ажлыг зөв эхлүүлэх, сайхан үр дүн гарах хамгийн сайн гарц байдаг. Үүнийг хаанаа хаанаа бодолцох хэрэгтэй. Сүүлийн 10 гаруй жил бид Монгол маркын газрын хамт олон болон Дамдинбазар захиралтай хамтран ажиллаж байна. Энэ хугацаанд алдаа мадагтай гарсан марк байхгүй гэдгийг би баттай хэлж чадна. Уг нь ингэж ажиллавал их сайн байгаа юм.” Гэжээ.