Нийгмийн сүлжээний Фэйсбүүк платформын толгой компани болох Мета саяхан 10.000 ажилтнаа цомхотгохоор болсон талаар бид өмнө нь мэдээлж байсан билээ. Тэгвэл энэ мэдээ хуучирч амжаагүй байтал цахим худалдааны салбартаа дэлхийд тэргүүлэгч Амазон компани ч мөн дахин цомхотгол хийхээр шийджээ.
Bloomberg News агентлагийн мэдээлснээр, Амазон компанийн гүйцэтгэх захирал Энди Жасси орон нутгийн цагаар 20-ны өдөр ажилтнууддаа илгээсэн захидалдаа ойрын хэдэн долоо хоногтоо багтаан дахин 9000 ажилтнаа цомхотгох болсноо зарласныг онцолсон байна. Ингэснээр өнгөрөгч нэгдүгээр сард 18.000 ажилтнаа цомхотгосон тус компани дахин томоохон бүтцийн өөрчлөлт хийж буй явдал юм.
"Эдийн засгийн таагүй нөхцөл байдал болон ирээдүйд тулгарах тодорхойгүй байдлыг харгалзан уг шийдвэрийг гаргахаас аргагүй байлаа. Энэ жил бидний баримтлах гол зарчим бол үндсэн бизнестээ илүү анхаарч, томоохон хөрөнгө оруулалтыг хийх явдал бөгөөд ингэхийн тулд илүү цомхон болох хэрэгтэй байна” хэмээн гүйцэтгэх захирал Жасси мэдэгджээ.
Түүнчлэн энэхүү бүтцийн өөрчлөлт нь үүлэн тооцоолол, хүний нөөц, зар сурталчилгаа, шууд дамжуулалтын “Twitch” үйлчилгээний албадуудад голчлон хамаарна гэдгийг мөн үеэр онцлон тэмдэглэв.
Тус компани нь цар тахал ид дэгдэж байх үед асар их хэмжээний ашиг орлогыг олоод зогсохгүй 2019 онд 798,000 байсан дэлхий даяарх ажиллах хүчний тоогоо 2021 оны эцэс гэхэд 1.6 сая гаруй болгон нэмэгдүүлээд байсан юм.
Эх сурвалж: MBC
