Гадаад худалдааны нийт эргэлт 2023 оны 03 дугаар сарын 19-ны өдрийн байдлаар 4,7 тэрбум ам.долларт хүрч өнгөрсөн оны дүнгээс 56,3 хувиар буюу 1,7 тэрбум ам.доллараар өссөн үзүүлэлттэй байна.
Түүнчлэн экспортын дүн импортын дүнгээс 1,5 тэрбум ам.доллараар давж, гадаад худалдааны баланс эерэг гарсан байна. Өнөөдрийн байдлаар Монгол Улс 107 улстай худалдаа хийснээс 39 улсад бараагаа экспортлож, 105 улсын гарал үүсэлтэй барааг импортолсон байна.
Энэ талаар ГЕГ-ын Статистик дүн шинжилгээний хэлтсийн дарга Э.Лхагвасүрэн өнөөдөр болсон хэвлэлийн бага хурлын үеэр мэдээлэл өгсөн юм. Тэрээр "Гадаад худалдааны бараа эргэлт 2023 оны эхний гурван сарын 20-ны гүйцэтгэлээр 4.8 тэрбум ам.долларт хүрч, өнгөрсөн оны мөн үеэс 56.3 хувь буюу 1.7 тэрбум ам.доллараар өссөн байна.
Үүнд, экспорт 1.5 тэрбум ам.доллараар, импорт 0.2 тэрбум ам.доллараар өссөн. Экспортын дүн импортын дүнгээс 1.5 тэрбум ам.доллараар давж, гадаад худалдааны бланс эерэг гарсан байна. Монгол Улс дэлхийн 107 улстай худалдаа хийснээс 39 улсад бараагаа экспортолж, 105 улсаас бараа импортлон авсан.
Экспортын хувьд 2023 оны эхний гурван сарын 20-ны байдлаар 3.2 тэрбум ам.долларт хүрч, өнгөрсөн оноос 1.5 тэрбум ам.доллараар буюу 96.3 хувиар өссөн. Үүнд, гол нөлөөлж байгаа бараа бүтээгдэхүүн нь эрдэс бүтээгдэхүүний экспорт, төмрийн хүдэр, чулуун нүүрс, зэс, цайрын баяжмал, жонш, боловсруулаагүй нефть зэрэг уул уурхайн бүтээгдэхүүн нь эрдэс бүтээгдэхүүний 98,4 хувийг, нийт экспортын 84 хувийг дангаараа эзэлж байна. Он гарснаар 11,5 сая тонн чулуун нүүрс экспортлогдсон. Энэ нь өнгөрсөн оны мөн үеэс 9,5 сая тонноор буюу 5,7 дахин өссөн үзүүлэлт юм. Зэсийн баяжмалын хувьд 301,5 мянган тонн зэс экспортлогдож, өмнөх оны мөн үеэс 4,9 мянган тонноор буюу 1,6 хувиар өссөн байна.
Нийт импорт 1,6 тэрбум ам.долларт хүрч, өнгөрсөн оны мөн үеэс 217,5 сая ам.доллараар буюу 15,2 хувиар өссөн байна. Он гарсаар Монгол Улсад 134,8 мянган тонн авто бензин, 251,7 мянган тонн дизель түлш оруулж иржээ. Үүнээс гадна 12491 ширхэг суудлын авто машин, 3393 ачааны автомашин тус тус импортлогдсон байна." гэдгийг энэ үеэр онцоллоо.
