Засгийн газраас өгсөн үүрэг, чиглэлийн дагуу Гаалийн байгууллага нь ил тод, нээлттэй, цахимд суурилсан үйл ажиллагаагаа өргөжүүлэх, шинэ системүүдийг нэвтрүүлэх ажлуудыг хийж хэрэгжүүлж байгаа билээ.
Гадаад худалдааны нийт эргэлт 2023 оны 03 дугаар сарын 19-ны өдрийн байдлаар 4,7 тэрбум ам.долларт хүрч өнгөрсөн оны дүнгээс 56,3 хувиар буюу 1,7 тэрбум ам.доллараар өссөн үзүүлэлттэй байгаа талаар өнөөдрийн хэвлэлийн бага хурлын үеэр албаныхан дурдаж байлаа.
Тэгвэл энэ үеэр ГЕГ-ын дэргэдэх Гаалийн төв лабораторийн дарга С.Цэрэнчимэд хэлсэн үгэндээ "Манай лаборатори 1996 онд байгуулагдсан. Улсын хилээр нэвтрүүлж буй бараа бүтээгдэхүүнд гаалийн зорилгоор магадлан шинжилгээ хийж, ангиллын кодыг тодорхойлж, дүгнэлт гаргадаг. Өнгөрсөн 2003 оноос хойш хар тамхи, мансууруулах бодис, согтууруулах ундаа, тамхи, тамхин бүтээгдэхүүн, нефтийн бүтээгдэхүүн, ноос ноолуур, малын гаралтай ширхэгт материал, хүдэр баяжмал, нэхмэл сүлжмэл бүтээгдэхүүн зэрэг чиглэлүүдээр шинжилгээ хийж байна. 2003 оноос хойш 2011 онд итгэмжлэлийн хүрээг өргөтгөж, найман нэр төрлийн 42 төрлийн бараа бүтээгдэхүүнд 77 үзүүлэлтээр шинжилгээ хийж байна.
Гаалийн шинэчлэлийн хүрээнд 164 тоног төхөөрөмж нийлүүлснээс 77-г нь төв лабораторид, бусдыг нь салбар лабораторит нийлүүлсэн. Гаалийн төв лабораторийг 2020-2023 онд олон улсын итгэмжлэлд хамруулах зөвлөх үйлчилгээг нэвтрүүлсэн.
Төслийн үр дүнд Гаалийн төв лаборатори нь олон улсын стандартын шаардлагыг хангаж, олон улсын 17025 сорьцын шалгалт, тохируулгад тавигдах ерөнхий шаардлагыг хангасан учраас Олон улсын лаборатори итгэмжлэлийн хамтын ажиллагааны байгууллагын гишүүн орон болох БНХАУ-ын итгэмжлэлийн байгууллагаас уул уурхай, хүдэр баяжмал, нүүрс, газрын тосны бүтээгдэхүүний шинжилгээний чиглэлээр нийт долоон нэр төрлийн бүтээгдэхүүнд 34 үзүүлэлтээр зургаан жилийн хугацаатай итгэмжлэгдсэн лаборатори болж гэрчилгээгээ авсан.
Яагаад БНХАУ-ыг сонгосон бэ гэхээр гадаад худалдааны гол харилцагч, экспортын барааны 90 гаруй хувийг эзэлдэг улс. Ингэснээр БНХАУ-д Монголын шинжилгээг хүлээн зөвшөөрөх юм.
Бидний хувьд жилээс жилд БНХАУ-ын итгэмжлэлийн хүрээг өргөтгөх, цаашлаад салбар лабораториудаа ОУ-ын итгэмжлэлд хамруулах үндэс тавигдаж байна." хэмээлээ.
