Нийслэлийн нутаг дэвсгэр дэх барилгын чанар, аюулгүй байдал, стандарт, өнөөгийн нөхцөл байдлын талаар “Барилгын чанар, аюулгүй байдал, стандарт” сэдэвт зөвлөгөөн эхэллээ.
Барилга байгууламжын хяналт шалгалт, зориулалтын бусаар ашиглаж байгаа, шаардлага хангахгүй барилгын асуудлаар Хотын стандарт, хяналтын газрын дарга С.Төмөрдулам мэдээлэл хийлээ.
Тэрбээр "Улаанбаатар хотод барилга байгууламжийг ашиглалтад оруулахад төлөвлөлт, угсралт, үйл ажиллагаа, ашиглалт гэх мэт барилгын хяналтын тогтолцоо байдаг. Барилгыг ашиглалтад оруулахад Монгол Улсад хүчин төгөлдөр мөрдөгдөж байгаа 10 гаруй хууль байгаа. Мэдээж тэдгээр дүрэм журам, баримт бичгүүд мөрдөгдөх ёстой. Энэ зөвлөгөөнд оролцож байгаа ААН, байгууллагуудад хамгийн чухал хэлэх гээд байгаа зүйл нь баригдаж байгаа барилгадаа хариуцлагагүй хандах нь таны, миний энэ байшинд амьдрах иргэдийн аюулгүй байдал алдагдана шүү л гэж хэлэх гээд байгаа юм. Мэдээж захиалагчийн, гүйцэтгэгчийн, хөндлөнгийн, төрийн хяналт гэж байх ёстой.
Барилгуудын нэг давхрыг үйлчилгээний чиглэлд зориулан ашигласан гомдлууд маш ихээр ирдэг. Бид барилга байгууламжуудыг хүлээж аваад зориулалтыг нь өөрчилж болохгүй гэдгийг хуулийн дагуу сануулдаг. Аль ч талдаа хариуцлагын асуудал. Иргэд маань өөрсдөө нэг давхрын байрыг худалдаж аваад үйлчилгээ эрхлэхийн тулд өрөө хоорондын хана нураах, шат хийх, зохисгүй газраар хаалга хийх зэрэг үйлдлүүдийг маш их хийдэг. Ийм гомдол дээр барилгын байцаагчид очоод зөрчлийн хуулиар торгодог, арга хэмжээ авдаг.
Барилгын салбарт мөрдөгддөг 665 стандарт байдаг. Өшөө олон олон улсын стандарт орж ирэх хэрэгтэй. Мөн хуучин стандартаа манай Стандарт хэмжил зүйн газрынхан эргэж хараад шинэчлэх, дүгнэлт гаргах хэрэгтэй" гэв.
