Лайвчин Д.Мөнх-Эрдэнийг дахин цагдан хорьсоныг эсэргүүцэж өчигдөр төрийн бус байгууллагын төлөөллүүд болон иргэд өчигдөр Хуульзүйн дотоод хэргийн яамны гадаа эсэргүүцэл илэрхийлж, ТНБД П.Сайнзоригтой уулзаж, суллахыг шаардсан билээ. Тодруулбал тэд "бай"-гаа олоогүй юм. Тэд шүүхийн гадаа буюу ШЕЗ-ийн гадаа очиж эсэргүүцэл илэрхийлэх ёстой байтал ХЗДХ-ийн сайд нь хүчээр хориулчихсан мэт ойлгож, тэнд үг үзэл бодлоо хэлж, эсэргүүцсэн юм.
Харин тэдний дунд УИХ-ын гишүүн асан Л.Гүндалай байсан бөгөөд тэрбээр П.Сайнзоригт хандаж "Мөнх-Эрдэнийг сулла, чи бол өнөөдөр хэний зараалаар ирсэн суганы үс бэ. Чи хэний цүнхийг барьсан суганы үс вэ. Юу хийгээд байгаа юм бэ. Чи ямар гавьяагаар дарга болсон бэ" гэж хэл амаараа доромжилж дайсан билээ. Тэгвэл энэ бичлэгийг нь үзсэн УИХ-ын гишүүн Б.Энхбаяр твиттер хаягтаа өөрийнхөө байр суурийг илэрхийлжээ.
Тэрбээр "12 жил УИХ-ын гишүүн, сайд, намын дарга байсан, Богд уулын газрын “эзэн” Л.Гүндалай Хууль зүйн яам шүүх, шүүгчийн шийдвэрийг шүүдэггүйг мэдсээр байж ийн аяглах. П.Сайнзориг дарга бол төрийн албаны яг мерит буюу шатлан дэвших зарчимаар гарч ирсэн төрийн мэргэшсэн албан хаагч" гэж Төрийн нарийн бичгийн даргыг өмөөрчээ.
