Улсын нэгдсэн төсвийн нийт орлого өмнөх оны мөн үеэс 16.4 хувиар өсжээ3/ 20/ 2023 8 цаг 46 минут
Улсын нэгдсэн төсвийн нийт орлого, тусламжийн хэмжээ 2023 оны эхний хоёр сарын урьдчилсан гүйцэтгэлээр 3 их наяд төгрөг болжээ. Энэ нь өмнөх оны мөн үеэс 422.9 (16.4 хувь) тэрбум төгрөг, тэнцвэржүүлсэн орлого тусламжийн хэмжээ 2.8 их наяд төгрөгт хүрч, 318.7 (12.9 хувь) тэрбум төгрөгөөр тус тус өссөн байна.
Нийт зарлага, эргэж төлөгдөх цэвэр зээлийн хэмжээ мөн оны эхний хоёр сард 2.8 их наяд төгрөг болж, тэнцвэржүүлсэн тэнцэл 22.6 тэрбум төгрөгийн ашигтай гарав. Төсвийн ашиг өмнөх оны мөн үеэс 9.6 (29.8 хувь) тэрбум төгрөгөөр буурчээ.
Татварын нийт орлого урьдчилсан гүйцэтгэлээр 2.6 их наяд төгрөг болж, өмнөх оны мөн үеэс 240.7 (10.2 хувь) тэрбум төгрөгөөр өсөхөд орлогын албан татварын орлого 61.5 (8.2 хувь) тэрбум төгрөг, нэмэгдсэн өртгийн албан татвар 85.7 (16.7 хувь) тэрбум төгрөг, нийгмийн даатгалын орлого 72.2 (17.5 хувь) тэрбум төгрөгөөр тус тус өссөн нь нөлөөлжээ.
Онцгой албан татвар 82.6 (46.6 хувь) тэрбум төгрөгөөр буурчээ.
Татварын нийт орлогод 2023 оны эхний хоёр сарын байдлаар нэмэгдсэн өртгийн албан татварын эзлэх хувь өмнөх оны мөн үеэс 1.3 нэгж хувиар, гадаад үйл ажиллагааны орлогынх 1.3 нэгж хувиар, нийгмийн даатгалын орлогынх 1.1 нэгж хувиар, бусад татвар, төлбөр, хураамжийн орлогынх 0.7 нэгж хувиар тус тус өссөн аж. Тэгвэл онцгой албан татварын орлогынх 3.9 нэгж хувиар, орлогын албан татварынх 0.5 нэгж хувиар буурсан байна.
Улсын нэгдсэн төсвийн зарлага, эргэж төлөгдөх цэвэр зээлийн хэмжээ мөн үед 2.8 их наяд төгрөг болж, өмнөх оны мөн үеэс 328.3 (13.5 хувь) тэрбум төгрөгөөр өсжээ. Зарлага өсөхөд урсгал шилжүүлгийн зардал өмнөх оны мөн үеэс 148.6 (9.9 хувь) тэрбум төгрөг, хүүгийн зардал 140.0 (2.7 дахин) тэрбум төгрөг, бараа үйлчилгээний зардал 126.4 (27.6 хувь) тэрбум төгрөгөөр өссөн нь голлон нөлөөлсөн хэмээн Үндэсний статистикийн хорооноос мэдээллээ.
Урсгал зардалд бараа үйлчилгээний зардлын эзлэх хувь энэ оны эхний хоёр сард өмнөх оны үеэс 1.6 нэгж хувиар, хүүгийн зардал 4.9 нэгж хувиар өсөж, харин урсгал шилжүүлгийн эзлэх хувь 5.4 нэгж хувиар, татаас 1.1 нэгж хувиар буурсан байна.
Хөрөнгийн зардал 221.3 тэрбум төгрөг болж, өмнөх оны мөн үеэс 80 (26.6 хувь) тэрбум төгрөгөөр буурсан байна.Үүнд барилга байгууламжийн зардал өмнөх оны мөн үеэс 108.6 (40.6 хувь) тэрбум төгрөгөөр буурсан нь нөлөөлжээ.
