УИХ-ын гишүүн Т.Доржханд хөгжлийн банкны сонгсголын дараагийн сонсгол нь “Нүүрс” хэмээн цахим хуудсандаа хуваалцлаа.
Тэрбээр “Хөгжлийн банкны нээлттэй сонсгол амжилттай зохион байгуулагдлаа.
Парламент дээрээ Ерөнхийлөгч, Ерөнхий сайд болон сайд дарга нар, томоохон бизнес эрхлэгчдийг гэрчээр дуудаж, ил тод, нээлттэй ярилцсан анхны тохиолдол.
Энэхүү сонсголыг анхлан санаачилсан гишүүний хувьд бүх хэлэлцүүлэгт оролцож, дахин ийм муу түүхийг давтаж болохгүй гэсэн дүгнэлтийг шийдвэр гаргагч нарт өгөхийг зорьж ажиллалаа.
Сонсголыг амжилттай зохион байгуулсан түр хорооны гишүүд, ажлын алба, шинжээчид болон МҮОНТВ хамт олонд талархлаа илэрхийлье!
Дараагийн сонсгол НҮҮРС” гэжээ.
Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явц, байдлыг хянан шалгах түр хорооноос зохион байгуулсан Нотлох баримтыг шинжлэн судлах гурав дахь шатны сонсгол өнгөрсөн долоо хоногт таван өдөр үргэлжилж, өндөрлөсөн.
Нотлох баримтыг шинжлэн судлах сонсголыг,
- Нэг дэхь шатны сонсгол 2023.01.16-20-ны өдрүүдэд зохион байгуулж, Хөгжлийн банкнаас шууд санхүүжүүлсэн 3.3 их наяд төгрөгийн 77 зээлийн зарцуулалттай холбоотой асуудлыг нотлох баримтад тулгуурлан, шинжлэн судалжээ
- Хоёр дахь шатны сонсгол 2023.02.06-08-ны өдрүүдэд болж, 2.9 их наяд төгрөгийн 355 төсөл, арга хэмжээнд олгосон зээлийн ашиглалт, зарцуулалтыг нотлох баримтад тулгуурлан шинжлэн судалсан байна
- Гурав дахь шатны сонсгол 2023.03.13-17-ны өдрүүдэд үргэлжилж, 2542 төсөл, хөтөлбөрийн хүрээнд 1.6 их наяд төгрөгийн дамжуулан зээлтэй холбоотой асуудлыг хэлэлцэхийн зэрэгцээ сүүлийн 10 жилийн хугацаанд Хөгжлийн банкны мөнгөн удирдлагын асуудлыг 3600 гаруй гэрээнд дүн шинжилгээ хийх замаар хэлэлцэн, олон нийтэд нээлттэй, ил тод дамжуулсан.
Эхний шатны сонсголд 166, хоёр дахь шатны сонсголд 67, гурав дахь шатны сонсголд 123 гэрч, нийтдээ 356 гэрч оролцсон байна. Нийт гурван шатны нотлох баримтыг шинжлэн судлах сонсголд 672 гэрчийг дуудан, мэдэгдэл хүргүүсний 53 хувь буюу 356 нь оролцжээ.
Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцын талаар хянан шалгах үүрэг бүхий түр хороо нь Улсын Их Хурлын 2022 оны дөрөвдүгээр сарын 15-ны өдрийн 14 дүгээр тогтоолоор байгуулагдсан.
Монгол Улсын Их Хурлын хяналт шалгалтын тухай хуулиар Хянан шалгах түр хороо нь нэг жилийн хугацаатай ажиллах бөгөөд 2023 оны дөрөвдүгээр сарын 15-ны өдрийн дотор нотлох баримтыг шинжлэн судалсан гурван шатны сонсголын тайланг боловсруулж, Улсын Их Хурлын чуулганы нэгдсэн хуралдаанд танилцуулна. Үүгээр Хяналт шалгалтын түр хороо татан буугдах зохицуулалттай юм.
Б.Ирээдүй
