Баасан гарагт Гааг дахь Олон улсын эрүүгийн шүүхээс ОХУ-ын Ерөнхийлөгч Владимир Путин, Хүүхдийн байгууллагын төлөөлөгч Мария Львова-Белова нарыг баривчлах шийдвэр гаргаж, Украины хүүхдүүдийг хууль бусаар албадан гаргасан хэрэгт хариуцлага тооцно гэж мэдэгдсэн.
Гаагийн шүүх Львова-Беловаг Путинтэй ижил гэмт хэрэгт сэжиглэж байна. Тухайлбал, Украины эзлэгдсэн нутаг дэвсгэрээс хүн амыг тэр дундаа хүүхдүүдийг албадан гаргаж ОХУ-д хууль бусаар шилжүүлсэн гэх хэрэгт буруутгаж байна.
Харин хатагтай Львова-Белова өөрөө Олон улсын эрүүгийн шүүхийн шийдвэрийг "түүний ажилд эерэг үнэлгээ өглөө" гэж үзэж байгаагаа хэлэв.
“Манай улсын хүүхдүүдэд туслах ажлыг олон улсын хамтын нийгэмлэг өндрөөр үнэлж, тэднийг дайны талбарт үлдээхгүй, гаргаж авч, сайн сайхан нөхцөлийг бүрдүүлж, хайр халамжтай хүмүүсээр хүрээлүүлж байгаа нь үнэхээр сайхан хэрэг. Надтай холбоотойгоор бүх улсаас, тэр дундаа Японоос ч хориг арга хэмжээ авсан, одоо баривчлах тушаал гарсан, цаашид юу болох нь сонирхолтой байна" гэж тэр RTVI-д өгсөн тайлбартаа хэлэв.
Мария Львова-Белова 2021 оны сүүлээр Хүүхдийн эрхийн бүрэн эрхт төлөөлөгчөөр томилогдсон. Үүнээс өмнө тэрээр Холбооны Зөвлөлд Пенза мужийг төлөөлж, Бүх Оросын Ардын Фронтын (Путины байгуулсан хөдөлгөөн) Пенза дахь салбарын удирдагчдын нэг байсан. Дараа нь Төрийн Думд ажиллахаар явсан Анна Кузнецовагийн оронд омбудсменаар /ард түмний төлөөлөгч" гэсэн утгатай нэр томъёо./ томилогдов.
38 настай Львова-Белова таван хүүхэдтэй бөгөөд үүнээс гадна өөр хэд хэдэн өргөж авсан хүүхэдтэй.
2022 оны хоёрдугаар сард Орос Украин руу дайрснаас хойш Лвова-Белова Украины хүүхдүүдийг эзлэгдсэн нутгаас гаргаж, Орост “интеграцчлах” ажлыг хариуцаж ирсэн. Тэрээр анхнаасаа олон нийтийн зүтгэлтэн, эдгээр үйл явцыг зохион байгуулагч байсан.
Харин тэр үүнийг үргэлж "нүүлгэн шилжүүлэх" гэж нэрлэж, хүүхдийн эрх ашгийг хамгаалах гэж тайлбарлаж байсан ч Украины эрх баригчид олон улсын эрх зүйн үүднээс эдгээр үйлдлийг албадан гаргах, геноцид гэж ангилдаг гэж удаа дараа мэдэгдэж байв.
Украины хүүхдүүдийг экспортлох үйл явцыг удирдсан Львова-Беловагийн эсрэг Европын холбоо, Их Британи, АНУ хориг арга хэмжээ авсан. Түүнчлэн Украины эсрэг Оросын түрэмгийллийг дэмжсэнийхээ төлөө тэрээр Австрали, Канад, Японы хориг арга хэмжээний жагсаалтад багтсан.
Эх сурвалж: ВВС