Олон нийтийн сүлжээнд хүний эрхийг хамгаалах хуульд тавьсан Ерөнхийлөгчийн хоригийг УИХ хүлээн авч, хэлэлцэн баталлаа. Энэ үеэр УИХ-ын гишүүн Б.Энх-Амгалан “Энэ хуулийн ач холбогдлыг мушгиж гуйвуулаад байна. Энэ хууль терроризм, эксторизм, үндэсний эв нэгдлийг бусниулах, төрийн болон албаны нууцыг задруулах террорист үйлдэл хийх үндэсний болон хүн төрөлхтний эсрэг гэмт хэрэг үйлдэхэд өдөөн турхирах садар самууныг сурталчлах, амиа хорлоход хүргэх уриалга ийм асуудлыг зохицуулж байгаа юм. Ерөнхийлөгчийн тавьж байгаа хоригийн асуудал бол хуулийг улам чамбайруул, нийгмийн хэрэгцээ шаардлагыг нь ойлгож байгаа, нэмж боловсруулаад оруулаад ир л гэсэн үг шүү дээ. Тэгтэл үүнийг маш буруу хууль баталчихсан юм шиг л нийгэмд ойлгуулаад байгаагаа болих хэрэгтэй.
Ингэж яриад байгаа хүмүүст нэг статистик мэдээлэл хэлж өгье. ХХЗХ-ноос гаргасан судалгаагаар Монгол Улсад фэйсбүүк хэрэглэгчдийн тоо 2,2 сая сошиал хэрэглэгчдийн тоо 2,8 сая байна. Түүнээс 1,1 сая хэрэглэгч нь хуурамч хэрэг байна гэж фэйсбүүк компанийн Монгол,Тайван, Хонконг дахь үйл ажиллагаа хариуцсан захирал Жорж чинь мэдэгдсэн 1,1 сая хуурамч хэрэглэгч ингээд байж байх нь зөв үү?
Нүүрээ, нүдээ, нэрээ нуучхаад хүн доромжилж байх нь зөв юм уу? Хоёрдох асуудал нь энэ Асемын үеэр 2016 онд мэргэжлийн байгууллага судалгаа хийхэд 35 мянган бүртгэлгүй дугаар байсан бол одоо энэ тоо 45 мянга болсон гэж ХХЗХ мэдэгдэж байна. Тийм учраас бүртгэлгүй дугаартай холбоотой асуудлыг цаашдаа яах ёстой вэ гэдгийн бодох хэрэгтэй. Гуравдах асуудал нь 2020 онд хийсэн судалгаагаар монгол улс кибер аюулгүй байдлын судалгаагаар 194 улсаас 120 дугаар байранд орсон.
Цахим засаглалын кибер аюулгүй байдлын индексээр 160 орноос 123 дугаар байранд байна. Монгол улс руу чиглэсэн кибер халдлагын тоо сүүлийн гурван жилийн хугацаанд огцом өссөн. Өдөрт хийгдэж байгаа кибер халдлага 1,8 сая гараад явчихсан. Үүний 80 гаруй мянга нь гаднын тусгай албаны санхүүжилттэй байх магадлалтай гэж байна. Энэ байдлыг хүлээн зөвшөөрөөд байж байх нь зүгээр үү? Гэмт хэргийн тоо сүүлийн жилүүдэд маш их өсжээ. Жишээ нь 2019 онд 737 цахим гэмт хэрэг үйлдэгдэж 985 сая төгрөгийн хохирол учруулсан. Тэгвэл 2022 онд энэ гэмт хэргийн тоо 11 дахин хохирол нь 22 дахин өсжээ. Энэ бид нар дохио өгөхгүй байна уу? Бид нар хүний эрх гэх нэрэн доор хуулийг мушгин гуйвуулж болохгүй” гэжээ.