Оросын "Ura.ru" хэвлэл мэдээллин байгууллага Уралын бүс нутгийн удирдлага дахь эх сурвалжаасаа иш татан 4-р сарын 1-ээс Орост гэрээт цэргүүдийг зэвсэгт хүчинд элсүүлэх мэдээллийн кампанит ажил эхлүүлнэ гэж мэдээлэв. Оны эцэс гэхэд эрх баригчид 400,000 мэргэжлийн цэргийн алба хаагчдыг гэрээт албанд татахаар төлөвлөж байна гэж тус сонинд бичжээ. Холбогдох мэдээллийг бүс нутгуудад аль хэдийн илгээсэн бөгөөд Засаг дарга нар бэлтгэл ажлыг хангаж байна.
Оросын бүс нутаг бүр өөрийн гэсэн квоттой. Жишээлбэл, Свердловск, Челябинск мужууд оны эцэс гэхэд 10 мянган гэрээ байгуулах төлөвтэй байгаа бол Пермийн хязгаар, Ямало-Ненецкийн автономит дүүрэгт стандарт доогуур байна.
2022 оны арванхоёрдугаар сард цэргүүдийг илүү мэргэжлийн болгож, гэрээт цэргүүдийн тоог нэмэгдүүлэх шаардлагатай гэж ОХУ-ын БХЯ-ны дарга Сергей Шойгу тус газрын удирдах зөвлөлийн хурал дээр мэдэгдэж байв.
Тэрбээр НАТО-гийн аюул заналхийлэл нэмэгдэж байгааг онцлоод, армийн бие бүрэлдэхүүний тоог 1.15-аас 1.5 сая болгон нэмэгдүүлэх шаардлагатай гэсэн юм. Үүний зэрэгцээ тэдний бараг тал хувь нь буюу 695 мянга нь гэрээт цэргийн албан хаагчид байх ёстой. Шойгугийн төлөвлөгөөний дагуу 2023 оны эцэс гэхэд мэргэжлийн цэргийн албан хаагчдын тоог 400-аас 521 мянган хүн болгон нэмэгдүүлэх ёстой.
Харин ОХУ-ын энэн төлөвлөгөөг ВВС агенилаг хэр бодитой талаар дараах байр суурийг идэрхийлжээ.
ОХУ-ын Батлан хамгаалах яамны шинэ төлөвлөгөөний амбицыг үнэлэхийн тулд Украинд довтлохоос өмнө Оросын арми гэрээт албанд шилжихэд хэр хол байсныг санах хэрэгтэй. Армийн ноён нурууг хугацаат цэргийн алба хаагчдаас илүү мэргэжлийн цэргүүд бүрдүүлдэг бүтэц рүү шилжих шаардлага олон жил яригдаж байна. Бодит байдал дээр энэ үйл явц маш хэцүү байсан. Тухайлбал, гэрээт цэргийн албан хаагчдын тоог 200-аас 400 мянган хүн болгон нэмэгдүүлэхэд албан ёсны мэдээллээр 2012-2020 он хүртэл 8 жил зарцуулсан. Гэсэн хэдий ч 2008 онд эхэлсэн Оросын армийн шинэчлэл үндсэндээ дуусаагүй байв.
Хэрэв дайралт эхлэхээс өмнө 400,000 гэрээт цэргийг элсүүлэх, сургах, армийн бүтцэд нэгтгэх ажилд олон жил зарцуулсан бол Оросын арми ердөө 8 сарын дотор дахин 400,000 цэрэг элсүүлэх гэж байгаа нь бүр тодорхойгүй байна.
Өөр нэг чухал асуулт бол эдгээр бүх шинээр элсэх гэрээт албан хаагчдыг хэн хэзээ сургах вэ? Цэргийн тусгай ажиллагааны үеэр Орос улс 1700 гаруй офицероо алдсаны ихэнх нь дэслэгч, ахмад цолтонгууд байгаа бөгөөд тэд ихэвчлэн ангиудын бие бүрэлдэхүүнийг сургаж, зохицуулдаг. Амиа алдсан офицеруудыг хурдан нөхөх боломжгүй, учир нь тэднийг сургахад олон жил шаардагддаг.
Үүний зэрэгцээ дайчилгааны эхний давалгаа харуулсанчлан Оросын армийн одоогийн дэд бүтэц нь олон тооны шинэ цэргүүдийг хүлээн авах, байрлуулах, сургахад бэлэн биш байв. Энэ нь ердийн дүрэмт хувцас, сум хэрэгсэл дутмаг, түүнчлэн татагдсан хүмүүсийн байлдааны бэлтгэл, анхан шатны байрны нөхцөл байдалтай холбоотой юм.
Энэ бүхнээс үзэхэд Орос улс дахиад 400 мянган гэрээт цэргийг хаанаас хэрхэн олох, хэн тэднийг сургах нь тодорхойгүй байна.
Эх сурвалж: ВВС болон URA news
