Шударга Өрсөлдөөн, Хэрэглэгчийн Төлөө Газар (ШӨХТГ)-аас хийсэн хяналт шалгалт, цаг үеийн асуудлаар өнөөдөр /2023.03.13/ хэвлэлийн бага хурал зохион байгуулав. Энэ үеэр гурилын үнийн өсөлттэй холбоотой асуултад ШӨХТГ-аас гурил үйлдвэрлэгч гурван ААН-д холбогдох арга хэмжээг тооцсон.дараах хариулт өглөө.
-Гурилын үнийн өсөлттэй холбоотой ШӨХТГ-ын хяналт, шалгалтын талаарх мэдээллийг өгнө үү?
Бид өнгөрсөн хугацаанд цаг үеийн шинжтэй тодорхой шалгалт хийсний дотор гурилын үнийн асуудал байгаа. Зөрчлийн тухай хуульд заасан үндэслэлээр зарим гурил үйлдвэрлэгч аж ахуйн нэгжүүдэд хяналт шалгалт явуулсан. Шалгалтаар зөрчил илэрсэн учраас хуулийн дагуу арга хэмжээ авсан. Тодруулбал, ШӨХТГ-аас гурил үйлдвэрлэгч гурван ААН-д холбогдох арга хэмжээг тооцсон.
-ШӨХТГ-аас гурилын үнэ нэмсэн 2-3 компанид арга хэмжээ тооцсон талаар хэллээ. Эдгээр зөрчилтэй ААН-ийн торгууль төлөлт эргээд ямар хэмжээтэй байдаг вэ?
Зах зээлийн өртөг буюу түүхий эд нь өсөөгүй байхад бүтээгдэхүүний үнийг өсгөсөн нь үндэслэлгүй байна гэж дүгнэлт гаргасан. Ийм үндэслэлээр дээр дурдсан гурил үйлдвэрлэгч гурван компанид торгууль ногдуулсан. Тухайн зах зээлд давамгай болон монополи ААН-үүд ноёлох үйл ажиллагаа явуулж буй, хэт давсан өндөр үнэ тогтоож байгаа эсэхэд урьдчилан сэргийлэх үйл ажиллагаа явуулдаг.
-Шалгах тусам дахиад үнээ нэмнэ гэдгийг “Алтан тариа” компанийн захирал мэдэгдсэн. Бодит нөхцөлд ч ШӨХТГ-ын хяналт шалгалтын дараа худалдааны төвүүдэд гурилын үнэ килограмм тутамдаа 20 төгрөгөөр нэмэгдсэн. Үүнд хариулт өгнө үү?
Улсын байцаагчийн тавьж буй торгууль хуулийн үндэслэлгүй эсэх нь шүүхээр шийдвэрлэх асуудал. Үүнийг миний зүгээс хэлэх эрх байхгүй. Зөрчлийн хэргийн холбогдогч ААН-үүд ч өөрийн үзэл бодлоор тайлбарлах ямар ч бололцоогүй.
М.Өлзийхишиг