“Оюу толгой” компани өнөөдөр 1300 метрийн гүнээс хүдрийн олборлолтоо албан ёсоор эхлүүллээ. Энэхүү түүхэн үйл явдлын нээлтийн үйл ажиллагаанд Ерөнхий сайд Л.Оюун-Эрдэнэ болон “Рио Тинто” компанийн удирдлагууд оролцож байна.
Ерөнхий сайд Л.Оюун-Эрдэнэ нээлтийн үеэр хэлсэн үгэндээ “Эрхэм хүндэт монголчууд аа, эрхэм хөрөнгө оруулагч нар аа, хүндэт зочид төлөөлөгчид өө, Оюу толгой төслийн бүтээн байгуулалтад гар бие оролцож, өмнийн говийн оргүй хоосон талаас өнөөдрийн бүтээн байгуулалтыг бүтээлцсэн инженер техникийн ажилчдадаа гүний уурхайн олборлолт эхэлж байгаа түүхэн өдрийн баярын мэнд хүргэе.
Монгол Улсын Засгийн газар 2022 оны 01.25-нд Оюу толгой хэлэлцээрийн хүрээнд Монголын талын 34 хувьд ногдох 2.3 тэрбум ам.долларын өрийг тэглэснээр ирээдүйд үүсэх 22 тэрбум ам.долларын өр хаагдсан. Ингээд олон жил талцсан гүнийн уурхайн бүтээн байгуулалтын гацаа гарч, эхний тэсэлгээг хийж байсан. Өнөөдөр хөрөнгө оруулагч тал 2023 оны эхний улиралд багтаан гүний уурхайг ашиглалтад оруулна гэсэн амлалтдаа хүрч чадлаа. Энэхүү амлалт, ажил хэрэг нь бидний хамтын итгэлцэлд хоёр талын цаашдын суурь зарчим болж чадна гэдэгт итгэлтэй байна.
Монгол Улсын Ерөнхий сайдын хувьд Оюу толгой төслийн гүний уурхайн 1265 метрийн гүнд орших 18 дугаар цооногоос дэлхийд дөрөвт эрэмбэлэгдэх уурхайтай болж байгааг дэлхий дахинд зарлаж байна. Энэхүү гүний уурхайн зэсийн баяжмал нь цахилгаан авто машины үйлдвэрлэл, дэвшилтэд технологийн эрин үе, ногоон хөгжлийн чиг хандлага, эх дэлхийнхээ амьдралын цаг хугацааг уртасгахад оруулж байгаа Монгол Улсын бодит хувь нэмэр юм. Оюу толгой төсөл бол ардчилсан тогтолцоонд шилжсэнээс хойш хийгдэж байгаа гадаадын хамгийн том хөрөнгө оруулалт төдийгүй Монгол Улс гурав дахь хөрш оронтой бие даан хэрэгжүүлж буй анхны түүхэн том төсөл юм.
“Оюу толгой” компани нь 2022 онд 1.4 тэрбум ам.долларын борлуулалт хийсэн нь цар тахлаас үүдэлтэй эдийн засагт чухал үүрэг гүйцэтгэсэн. Оюу толгой төслийн өнөөдрийг хүртэлх зам дардан байгаагүй нь үнэн. Баялагтаа эзэн байхыг хүссэн, нийт монголчуудын эрх ашгийг хамгаалж, Монгол Улсын Засгийн газарт улс төрийн дэмжлэг үзүүлж ажилласан Монгол Улсын Ерөнхийлөгч У.Хүрэлсүх, УИХ ын дарга Г.Занданшатар, УИХ-ын түр хороо, ажлын хэсгийн ахлагч, эхнээс нь ажилласан, төслийг урагшлуулахын төлөө гал атгасан, засч сайжруулахын төлөө зүтгэсэн эх орончид хөрөнгө оруулагч нартаа Засгийн газрыг төлөөлж, талархал илэрхийлье.
Оюу толгой төсөл бол та бидний 10 гаруй жилийн хамтын бүтээл юм. Оюу толгойн гүний уурхайн төсөл жилд 500 мянган тонн зэсийн баяжмал үйлдвэрлэж, нэг хүнд ногдох ДНБ-ийг 10 мянган ам.долларт хүргэх монголчууд бидний олон жилийн мөрөөдлийг бодитой ажил болгож, цаг хугацааг наашлуулж чадна гэдэгт итгэлтэй байна" гэлээ.