Орос улс Иранд Су-35 сөнөөгч онгоц нийлүүлнэ. Ираны засгийн газар Москватай гэрээ байгуулснаа зарласан бол Оросын тал хэлэлцээрийн талаар албан ёсоор тайлбар хийгээгүй байна.
"Су-35 сөнөөгч онгоц техникийн хувьд Иранд ашиглахад тохиромжтой. Иран тэднийг худалдан авах гэрээг эцэслэн баталлаа" гэж Ираны телевиз, радиогийн IRIB компани мэдээлжээ.
Ираны хэвлэл мэдээллийн эх сурвалж гүйлгээний дүнг нэрлээгүй бөгөөд дэлгэрэнгүй мэдээллийг өгөөгүй байна. Түүнчлэн Иран бас хэд хэдэн орноос цэргийн нисэх онгоц худалдан авах сонирхолтой байгааг мөн мэдээнд дурджээ.
Ираны нисэх хүчинд хэдхэн арван байлдааны нисэх онгоц байдаг. Эдгээр нь 1979 онд Иранд болсон Исламын хувьсгалаас үлдсэн Оросын болон Америкийн хуучирсан загварууд юм.
2018 онд Иран өөрийн "Kowsar" сөнөөгч онгоцоо үйлдвэрлэж эхэлснээ зарласан. Зарим шинжээчдийн үзэж байгаагаар "Kowsar" бол 1960-аад оноос АНУ-д үйлдвэрлэгдэж эхэлсэн F-15 онгоцны хуулбар юм.
Орос, Ираны цэрэг-техникийн хамтын ажиллагаа барууныхныг ихээхэн түгшээж байна. Өнгөрсөн оны сүүлээр АНУ-ын Үндэсний аюулгүй байдлын зөвлөлийн төлөөлөгч Жон Кирби хоёр улс бие биедээ урьд өмнө байгаагүй цэргийн дэмжлэг үзүүлж эхэлсэн гэж мэдэгджээ.
ОХУ-ын Ерөнхийлөгч Владимир Путин өнгөрсөн долдугаар сард Тегеранд Ираны дээд удирдагч Аятолла Хаменеитай уулзсан. Үүнээс сарын дараа буюу наймдугаар сард АНУ-ын тагнуулын алба Тегеран Москвад Украин дахь байг цохихын тулд камикадзе нисгэгчгүй онгоц нийлүүлж эхэлсэн гэж мэдээлсэн юм.
Эхэндээ талууд энэ мэдээллийг эрс няцааж байсан ч удалгүй Украины нутаг дэвсгэр, байгууламжид Ираны Шахед-31, Шахед-36 нисэгчгүй онгоцууд халдаж эхэлсэн юм.
Эх сурвалж: ВВС
