"Вагнер"-ийг үүсгэн байгуулагч Евгений Пригожин Бахмутаас бас нэгэн видео бичлэг нийтэлж бүлгийнхээ сар бүр хийх довтолгооны зардлын талаар ярьжээ.
12-р сарын сүүлчээс хойш фронтын Бахмут хэсэгт тулалдаж байгаа хөлсний цэргүүдэд шаардлагатай сум хэрэглэлийг худалдаж авч чадаж байгаа эсэх талаарх асуултад Пригожин хариулахдаа "манай давшилтын бүлэглэлд сард ойролцоогоор 10,000 тонн сум шаардлагатай байна" гэжээ.
“Нэг кг сум 50 доллар, 10 мянган тонн нь 500 сая. Хэрэв өндөр нарийвчлалтай пуужин, танк, пулемёт зэргийг нэмбэл дахиад 500 сая хэрэгтэй болно. Нийтдээ нэг тэрбум болно гэсэн үг хэмээн Пригожин арифметик тооцоогоо хуваалцаад "Би улс төрийн амбицгүй болохоор надад сум өгөөч” гэсэн юм гэж нэмж хэлэв.
Пригожин Бахмутын зүүн хэсэгт байрлах Щедра гудамжины есөн давхар байшингийн дээврээс бичлэг хийжээ. Түүний арын Горькийн гудамжинд Евангелийн сүм байдаг бөгөөд бичлэг хийх газраас 700 метрийн зайд Бахмутка гол урсдаг.
Хоёрдугаар сарын сүүлчээр Пригожин зүүн зүгт нэг километрийн зайд байрлах Артёмовскийн шампанскийн үйлдвэрийн нутаг дэвсгэрээс хэд хэдэн видео бичлэг нийтэлсэн нь энэ хот руу дайрах үеийн хөлсний цэргүүдийн давшилтын хурдыг тооцоолох боломжийг олгож байна.
Их Британийн цэргийн шинжээч Филипп Инграмын хэлснээр Бахмут руу хийж буй дайралтынхаа үеэр Оросын тал 30 мянган хүний хохирол амссан байж магадгүй юм.
Эх сурвалж: ВВС
