Гурван настай хүү гуравдугаар сарын 8-нд маш хүнд гэмтэлтэй, ухаагүй Гэмтэл согог үндэсний төвд иржээ. Түүнийг ээжийнх нь хамтран амьдрагч 34 настай Э зодсон бөгөөд хүүхдийг эмнэлэгт хүргээд оргон зайлсан байсныг хайж олсон гэсэн мэдээллийг цагдаагийн байгууллагаас өгөөд байгаа юм.
Тэгвэл хүүхдийн биеийн байдлын талаар ГССҮТ-ийн Эмнэлгийн тусламж, үйлчилгээ хариуцсан дэд захирал Р.Гантуяа мэдээлэл өглөө.
Тэрээр “ГССҮТ-д гуравдугаар сарын 8-ны 09.40 цаг орчимд шалтгаан тодорхойгүй, биеийн байдал маш хүнд хүүхэд 103-аар хүргэгдэж ирсэн. Хүүхдийг хүлээж аваад манай эмнэлгийн Хүлээн авах, яаралтай тусламжийн тасгийн эмч нар үзлэг шинжилгээ хийсэн. Хүүхдийн биеийн байдал маш хүнд, хавсарсан хүнд гэмтэлтэй, зөөлөн эдийн няцрал ихтэй, сээр нурууны III нугалмын их биеийн хугаралтай, баруун шууны хугаралтай, тархины хүнд гэмтэлтэй байсан. Тиймээс хүүхдийг Эрчимт эмчилгээний тасагт амьсгалын аппаратад аваад хоёр дахь хоног дээрээ эмчилж байна.
Өнөөдөр Эх нялхсын эмч нартай хамтраад оношлоогоо шинжилгээ хийлээ. Хүүхдийн шулуун гэдэсний орчимд зөөлөн эдийн няцрал, гэмтэл ихтэй гэсэн онош өнөөдөр нэмж гаргасан. Хүүхдийн биеийн байдал маш хүнд амьсгалын аппаратад байна. Ер нь сүүлийн үед бага насны хүүхдүүд зодуулах, бэртэж гэмтэх, өндрөөс унаж ирэх нь ихсээд байгаа. Энэ тухай сэрэмжлүүлгийг манай байгууллагаас байнга хүргүүлж байгаа” гэсэн юм.
