Хятадын парламентын гишүүд тус улсын хүн амын тоо буурч байгаатай тэмцэх ажлын хүрээнд залуучуудын ажлын өдрийг хязгаарлаж, наймаас дээш цагаар ажиллахыг хориглох санал гаргасан гэж "Financial Times" мэдээлжээ.
Ингэж байж залууст "дурлаж, үр удмаа үлдээх" цаг хугацааг нь нэмэгдүүлэх болно гэж депутатууд үзэж байна. Тиймээс ийм саналыг Ардын Улс төрийн Зөвлөлдөх Зөвлөлийн Үндэсний Хороо болон БХАТИХ-ын жил тутмын чуулганд хэлэлцүүлэхээр өргөн мэдүүлсэн байна.
Түүнчлэн цэцэрлэгийн насныханд бэлгийн хүмүүжлийн хичээл оруулах саналбас байгаа аж. "Барууныхны түгшүүртэй нэвтрэлтийг" зогсоохын тулд хичээлийг зөвхөн хятад сурах бичгээр явуулах ёстой гэж депутатууд шаардав.
2021 оны тавдугаар сард Хятадын эрх баригчид тус улсын хүн ам зүйн байдлыг сайжруулахын тулд гэрлэсэн хосуудад гурван хүүхэдтэй болохыг зөвшөөрчээ. “Нэг өрх-нэг хүүхэд” бодлогыг Хятадад 1979 оноос нэвтрүүлсэн. Харин 2016 оноос хойш иргэд хоёр хүүхэдтэй болохыг зөвшөөрсөн юм.
Хятадын Төрийн статистикийн газрын мэдээлснээр, 2022 онд тус улсын хүн ам сүүлийн 60 жилд анх удаа өмнөх оныхоос 850 мянган хүнээр буурчээ. 2021 онд тус улсад 9.56 сая хүүхэд төрж, 10.41 сая хүн нас баржээ.
БХАТИХ-ын чуулган гуравдугаар сарын 5-нд эхэлсэн бөгөөд гуравдугаар сарын 13 хүртэл үргэлжилнэ. Чуулганд 2977 төлөөлөгч оролцож байна. Чуулганы үеэр хууль тогтоогчид өнгөрсөн хугацаанд БНХАУ-ын нийгэм, эдийн засгийг хөгжүүлэх төлөвлөгөөний хэрэгжилтийн тайланг хэлэлцэж, улс орны хөгжлийн үндсэн чиглэлийг тодорхойлж, 2023 оны төсвийг батлах юм.
Эх сурвалж: Centralasia
