Хоёрдугаар сарын эцсийн байдлаар Монгол Улсын гадаад валютын албан нөөц 3.39 тэрбум ам.доллар болж, өмнөх сараас 4.63 хувиар буурсан бол оны эхэн үетэй харьцуулахад 0.14 хувиар буурлаа. Энэ нь өмнөх оны мөн үетэй харьцуулахад 7.87 хувиар буурсныг Монголбанк мэдээлэв.
Гадаад валютын албан нөөцийн 2.15 тэрбум ам.доллар нь харилцах, хадгаламж хэлбэрээр гадаадын банк санхүүгийн байгууллагуудад байршиж байна. Энэ нь өмнөх сартай харьцуулахад 8.3 хувиар буурсан бол 2022 оны 12 дугаар сартай харьцуулахад хоёр дахин өсжээ.
Үлдсэн нь Олон Улсын Валютын Санд байршуулсан хөрөнгө, зээлжих тусгай эрх болон бусад нөөц байна. Мөн 320 сая ам.доллар нь алтны хадгаламж, алтны своп хэлцэлд хамаарч байгаа аж. Үүнийг биет хэмжээгээр илэрхийлэхэд 0.17 сая трой унц алт болж байгааг Монголбанк мэдээллээ.
Хоёрдугаар сард Монголбанк цахим талбарт долоон удаагийн гадаад валютын дуудлага худалдаа зохион байгуулж, 310 сая ам.долларыг спот арилжаагаар нэг ханшаар захад нийлүүлсэн байна.