Хятад улс 2023 онд Тайваний арлыг "энх тайвнаар нэгтгэх үйл явцыг ахиулах" талаар "шийдвэртэй алхам" хийнэ гэж БНХАУ-ын засгийн газрын тайландаа дурджээ.
Гэхдээ Засгийн газрын тайланд Хятадын эрх баригчдын Тайванийн талаарх яриа нэг их өөрчлөгдөөгүй гэж Bloomberg тэмдэглэв.
"Бид Тайваний хоолойн хоёр эргийн харилцааг энх тайвнаар хөгжүүлж, Хятад улсыг энх тайвнаар нэгтгэх үйл явцыг ахиулах ёстой" гэж Ерөнхий сайд Ли Көчян онцлон тэмдэглэсэн байна. Тэрээр 30 жилийн өмнө Хонконгд болсон уулзалтын үеэр Бээжин, Тайбэй хоёрын тохиролцсон 1992 оны зөвшилцөл, "Нэг Хятад" зарчмыг баримтлах хэрэгтэй гэжээ. Энэ нь Хятадын нэгдмэл байдлыг хоёр тал хүлээн зөвшөөрч байгаа гэсэн үг юм гэдгийг тэрбээр онцолсон байна.
Бээжин Тайванийг өөрийн нутаг дэвсгэр гэж үздэг бөгөөд тус арлын эрх баригчдын зүгээс үзүүлж буй аливаа үйл ажиллагаа, тэр дундаа гадаадын засгийн газрын төлөөлөгчдийн айлчлалыг тусгаар тогтнолд халдсан үйлдэл гэж үздэг. 1949 онд Бээжингээс тусгаар тогтнолоо зарласан Тайбэй Хятадын “нэг улс хоёр систем” загвараас татгалзсаар байгаа юм.
Сүүлийн гурван жилийн хугацаанд Хятад улс арлын ойролцоох цэргийн үйл ажиллагааг нэмэгдүүлсэн. Тодруулбал, тухайн үед АНУ-ын Төлөөлөгчдийн танхимын даргаар ажиллаж байсан Нэнси Пелоси Тайваньд айлчилсны хариуд Бээжин 2022 оны наймдугаар сард Тайваний хоолойд цэргийн сургуулилалт хийж эхэлсэн юм. Хятад улс энэхүү айлчлалыг эрс шүүмжилж, Вашингтонтой хэд хэдэн салбарт хамтын ажиллагаагаа зогсоосон байна. Үүний хариуд АНУ Пелоси айлчилсан нь “нэг Хятад” зарчимд харшлахгүй, Хятадад хандах Вашингтоны бодлогыг өөрчилнө гэсэн үг биш гэж мэдэгдэж байв.
АНУ нэг Хятадын бодлогыг тууштай баримтална гэдгээ нотлохын зэрэгцээ 1979 оноос хойш Тайваний аюулгүй байдалд гадны аюул заналхийлсэн тохиолдолд тус улс зэвсэг нийлүүлэх хуультай болсон.
Тагнуулын төв газрын дэд захирал Дэвид Коэн өнгөрөгч намар хэлэхдээ, Хятад улсын дарга Ши Жиньпин 2027 он гэхэд Тайваньд цэргийн хяналт тогтооход бэлтгэхийг армидаа даалгасан. Гэвч Америкийн тагнуулынхан Хятадын удирдлага энэ асуудлаар эцсийн шийдвэр гаргасан гэдэгт итгэхгүй байна гэж байв.
Эх сурвалж: Сentralasia.media
