“HP” компанийн орлого санхүүгийн жилийн I улиралд 19 хувиар буурчээ
“HP” компанийн орлого санхүүгийн жилийн I улиралд 19 хувиар буурч, 13.8 тэрбум ам.доллар боллоо. Шинжээчид тус компанийг 14 тэрбум ам.долларын орлоготой ажиллана гэж таамаглаж байсан юм.
Орлого нь ийнхүү буурахад хувийн хэрэглээний компьютерын борлуулалт 36 хувиар буурсан нь голлон нөлөөлснийг тус компани тайландаа онцолжээ.
“HP” энэ санхүүгийн жилд чөлөөт мөнгөн урсгал нь 3.2 тэрбум ам.доллар хүрнэ гэсэн өмнөх төсөөллөө хэвээр үлдээсэн байна. Харин шинжээчид гурван тэрбум ам.доллар байна гэж таамаглаж байгаа юм.
Тус компанийн төсөөлөл харьцангуй эерэг байгаа нь компьютерын зах зээлийн уналтыг давж чадна гэж үзэж байгаагийн дохио болохыг шинжээчид мэдээлэв.
“IDC” судалгааны байгууллага 2022 оны IV улиралд дэлхий даяар компьютерын борлуулалт эрс буурсан гэж тооцоолжээ. Компьютер үйлдвэрлэгч томоохон компаниуд дунд “HP”-ийн борлуулалт хамгийн өндөр дүнгээр буурсныг тайланд онцолсон байна.
Хэрэглэгчдийн эрэлт буурч байгаатай холбоотойгоор зардлаа танахаар “HP” компани өнгөрсөн оны 11 дүгээр сард 7000 гаруй ажилтнаа цомхотгосон юм.
