УИХ-ын гишүүн асан Ж.Батзандан Австрали дахь цөллөгөө хаяаад эх орондоо иржээ. "Шударга 5" гэгдэж М.Энхболдын ноёрхлыг эсэргүүцэж явсан тэрээр энэ удаад хамтран зүтгэж явсан Л.Оюун-Эрдэнэ найзаа дуэльд дуудлаа. Шударга ёс тогтоож, ямар нэгэн албан тушаал горилоогүй, очихгүй хэмээн өвлийн хүйтэн өдрүүдэд төв талбайд тэмцэж явсан таван гишүүнээс гол үүрэг гүйцэтгэсэн Ж.Батзандангаас бусад нь томоохон албан тушаалд очсон. Тэрээр мэдээлэл хийх үеэрээ " МАНАН дэглэмийн эсрэг тэмцлээ эцэст нь хүргэхээр, Австрали, Шинэ Зеланд, Швейцарийн загварт суурилсан хөгжлийн шинэ бодлого хэрэгжүүлэхээр эргэн ирлээ. Би Л.Оюун-Эрдэнэд үнэнийг нь хэлэх гэж ирлээ. Түүнд олон алдаа дутагдал байгаа. Хамт тэмцэж байсан нь хамаагүй. Одоо үнэнтэй нүүр тулах ёстой. Ард түмний амьдрал хүнд байна. Авлига алга болоогүй байгаа.
Тийм учраас Л.Оюун-Эрдэнэтэй, Х.Нямбаатартай, Ерөнхийлөгч У.Хүрэлсүхтэй өнөө маргаашгүй уулзана. Монгол системийн өөрчлөлт хийе. Монголд шинэ хувьсгал хийе. Энэ улсыг өөрчлөхгүй бол болохгүй байна гэдгийг хэлнэ. Яаж өөрчлөх вэ? гэдэг хөгжлийн загваруудыг өөрийн бичсэн номондоо маш тодорхой тусгасан байгаа. Надад ямар нэгэн дарга хэрэггүй. Би өнөөдөр чөлөөт иргэн болсон. Чөлөөт иргэн Ж.Батзандан чөлөөт иргэний тэмцэл хийх болно" хэмээсэн юм. УИХ-ын гишүүн асан Ж.Батзандан Ерөнхий сайд Л.Оюун-Эрдэнийг халз мэтгэлцээнд дуудаж байгаа талаараа "Би 50 мянган иргэдийн өмнө ярьсан зүйлээ хэрэгжүүлэх байх гэж итгэн 1.6 жил чимээгүй суулаа. Одоо хоёулаа гараад ард түмнийхээ өмнө мэтгэлцье. Юу хийж чадахгүй байна, яагаад хийж чадахгүй байгагаа ард түмэндээ үнэнээр нь хэл. Хэрэв чи шинэчлэл хийж Монгол Улсыг аврахгүй юм бол танай Засгийн газар огцорно, Л.Оюун-Эрдэнэ ээ" хэмээсэн юм.Чөлөөт иргэн болсон Ж.Батзандан Австралиас ирэхдээ номтой иржээ. Уг номондоо "Монгол эх орноо аврах 18 хувьсгал"-ыг багтаалаа" гэсэн юм. Тэрээр 4 найздаа гомдсон сэтгэлээ "Шинэ хувьсгал" хийж тайлахаар иржээ.
