УИХ-ын ээлжит бус сонгууль ирэх 09 дүгээр сард явагдана гэх мэдээллийг улс төрийн хүрээнд бат итгэлтэйгээр цайны хачир болгон ярих болжээ. Чухам яагаад ийм итгэлтэй байгаа юм гэдэг нь гайхшрал төрүүлж байна.
Улс төрийн нөхцөл байдал нэлээн бужигнаантай, төрд шургалан хулгай хийж, боломж хумслагчид “баргар” өдрүүдийг өнгөрүүлж буй. Гэвч энэ бүх асуудал хаашаа эргэж, хэрхэн шийдвэрлэгдэх нь тодорхойгүй нөхцөл байдлыг үүсгэж, гүйцэтгэх засаглалын үйл ажиллагааг нураах гэсэн ашиг сонирхол хэн нэгэнд байх шиг байна. Чухам хэн гэгч нь ийм ашиг сонирхол өвөртлөн явааг таашгүй. Магадгүй энэ Засгийн газрын үйл ажиллагааг зогсоох гэсэн бүлэглэл л нийгэмд ийм шуум дэгдээж, эхлүүлсэн ажлыг нь зогсоох санаархлаа цухалзуулж байхыг үгүйсгэхгүй. Яагаад гэвэл, сүүлийн үед талбайг ажлын байр болгосон “гар”-ууд 2023 он гарав уу, үгүй юу л ЖАГСААЛ зохион байгуулна гэдгээ удаа дараа мэдэгдэх болсон.
Ер нь бол төр засагтаа дуу хоолойгоо хүргэх гэсэн иргэдийн хүсэл сонирхол дээр улстөрийн тоглолт хийх сонирхол бүлэглэлүүдэд байдаг. Энэ нь ч өнгөрсөн жагсаал цуглаанаар тодорхой харагдсан. Түүнчлэн эх орныхоо төлөө хэмээн өөрсдийгөө тодотгож, дуугарч байгаа аливаа хувь хүн, хэсэг бүлэг хүмүүсийн ард ямар нэгэн гадны санхүүжилт байсан нь эхнээсээ илэрч, хууль хяналтын байгууллагаар шалгагдан тогтоогдож байгаа. Хамгийн сүүлд л гэхэд ОХУ болон Украйны хооронд үүсээд байгаа нөхцөл байдалтай холбоотойгоор Монгол, Орос хоёр улсын гадаад харилцаанд хөндлөнгөөс оролцох гэсэн, өдөөн хатгасан үйлдлүүдийг ашиг сонирхол нь үл мэдэгдэх хэсэг бүлэг хүмүүс хийж, сошиалд өөрсдийнхөө үйлдлийг түгээх, хүмүүсийн санаа сэтгэлийг үймлэх гэсэн оролдлогуудыг хийж байсан, Одоо ч хийсээр байгаа… Тэдний ээлжит даалгавар нь маргааш буюу 03 дугаар сарын 01-ний өдөр жагсаал зохион байгуулах тул олон нийтийн сүлжээгээр дамжуулан иргэдийг жагсаалд уриалан дуудаж байна. Шуудхан хэлбэл, гадныхны санхүүлсэн жагсаалаар амь зогоох болсон “эх орончид” гэх иргэний хөдөлгөөнийхөн, хэсэг бүлэг иргэдийн эрээ цээргүй үйлдэл нь эцэсдээ Монголыг молголчуудаар нь сүйрүүлэх гадны технологи гэдгийг яагаад ухаарахгүй байгаа юм бол. Өөрсдийгөө жагсагч, тэмцэгч гэх өргөмжлөх “эх орончдод” монголын ард түмний нэрийг барих эрх байхгүй. Тэдэнд эх орон, эрх чөлөө хэрэггүй, өнөө маргаашаа аргацаах мөнгө хэрэгтэй байж болох ч гэнэтийн ухаарал хожимдсон байх вий дээ.
Сэтгүүлч Ч.Лодойсамбуугийн хэлсэнчлэн бид хэрсүү л байхгүй бол гадна дотны санхүүжилттэй бүлэглэл Монголын төрөөр яаж л бол яаж тоглоход бэлэн байгааг өнгөрсөнд болсон үйл явдлууд тодорхой харуулсаар байна. Хэрсүү байж Үндэсний аюулгүй байдал, тусгаар тогтнолтой холбоотой асуудалд няхуур хандая. Жижигхэн улс төрийн тоглоомын золиос болж, амар тайван амьдралаа сүйрүүлвэл Монгол хожихгүй, улс орны баялагт шунасан харийнхан л хожино гэдгийг дор бүрнээ ухамсарлах шаардлагатай байна.
Н.ЧИНЗОРИГ
