Аргентины шигшээ багийн ахлагч, Парис Сант Жермен клубийн довтлогч Лионел Месси ФИФА буюу Олон Улсын Хөл Бөмбөгийн Холбооны 2022 оны "Шилдэг эрэгтэй тоглогч"-оор шалгарлаа.
Өдгөө 35 настай тэрбээр Францын залуу од Килиан Мбаппе, Реал мадридын довтлогч Карим Бензема нарыг саналын тоогоороо илүүрхсэнээр энэхүү шагналыг хоёр дахь удаагаа гардав.
Тэрбээр шилдэг тоглогчоор шалгарсныхаа дараа сэтгэгдлээ хуваалцахдаа "Гайхалтай жил байлаа. Энд байж, энэ шагналыг хүртсэн нь миний хувьд нэр төрийн хэрэг. Багийн маань найзууд байгаагүй бол би энд байхгүй байх байв. Удаан хугацаанд мөрөөдөж байсан мөрөөдлөө биелүүллээ. Маш цөөхөн хүн үүнд хүрч чадах байх, би азтай байсан" хэмээжээ.
Л.Месси Аргентины шигшээ багаа ахлан "Катар 2022" Дэлхийн Аварга Шалгаруулах Тэмцээн(ДАШТ)-д түрүүлсэн бөгөөд 2021-2022 оны улиралд 49 тоглолтод 27 гоол оруулсан амжилтыг үзүүлсэн байна.
Оны шилдэг тоглогчийг шалгаруулах үеэр өнгөрсөн жилийн гарааны 11 шилдэг тоглогчийг нэрлэв.
Үүнд:
- Тибо Куртуа (Реал Мадрид/Бельги),
- Ашраф Хакими (ПСЖ),
- Виржил Ван Дайк (Ливерпүүл),
- Жоау Канселу (Манчестер Сити),
- Кевин Де Брюне (Манчестер Сити),
- Касемиру (Манчестер Юнайтед),
- Лука Модрич (Реал Мадрид),
- Лионель Месси (ПСЖ),
- Карим Бензема (Реал Мадрид),
- Килиан Мбаппе (ПСЖ),
- Эрлин Холанд (Манчестер Сити) нар багтжээ.
