“УИХ-ын гишүүн Н.Наранбаатарыг прокурорын байгууллагаас яллагдагчаар татсан” гэх мэдээлэл тархав. Мэдээж шалтгаан нь өнөөх л “Нүүрсний хулгай”-н хэрэг.
Нүүрсний хулгайн хэрэгт хамгийн түрүүнд өдгөөгийн УИХ-д сууж буй 5 гишүүн буюу Б.Баттөмөр, Ц.Сэргэлэн, Ц.Анандбазар, Ш.Раднаасэд, Н.Наранбаатар нарын нэрс зарлагдаж хэсэгтээ л шуугьж байв. Мань нөхдүүд ч “Зүгээр байхад зүү шидээд байвал...” гэсэн өнгө аястайгаар хэвлэлийн хурал зарлаж “Бид ямар ч буруугүй” гэж сүржигэнэсэн. Зарим нь бүр “Буруугүй” гэсэн бичиг хүртэл эрх бүхий байгууллагаас гаргуулж авчхаад түүнийгээ цахим орчинд нийтэлж харагдсан.
Тэгвэл Н.Наранбаатар гишүүнийг ийнхүү яллагдагчаар татаж. Түүнийг нүүрс тээвэр болон орон нутгийн Тавантолгойн ногдол ашигтай холбоотой асуудалд хамаатуулан шалгаж буй аж.
Тэрбээр эхлээд зарлагдахдаа ангийнхаа 4 гишүүний хамт байсан бол өдгөө Б.Бадраа, Р.Сэддорж, Б.Эрдэнэ-Очир, Х.Мандахбаяр гэх зэргээр Өмнөговь аймгийн 4 нөхрийн хамт холбогдчихоод байгаа учраас түүнийг ийнхүү шалгахаар болсон байна. Тиймээс мөдхөн түүний бүрэн эрхийн асуудлыг ч бас хөндөж ярих нь.
Харин эрхэм гишүүн хэрхэх нь олонд сонин байх нь мэдээж.
ErenNews.mn
С.Цээл
