Хятадын технологийн томоохон компаниудын "загалмайлсан эцэг” гэгддэг тэрбумтан Бао Фан сураггүй болоод 11 хонож байгаа бөгөөд түүний өөрийнх нь компаниас өчигдөр л эрх баригчидтай хамтран ажиллаж, мөрдлөгийн үйл ажиллагаанд оролцож байгаа хэмээн албан ёсоор мэдэгдсэн байна.
“China Renaissance Holdings”-ийн үүсгэн байгуулагч, гүйцэтгэх захирал Бао нь сураггүй болсны маргаашаас тус компанийн хувьцааны ханш илт унасан бөгөөд өнөөдрөөс өсч эхэлсэн гэнэ.
Учир нь тус компанийн ТУЗ нь “Ноён Бао БНХАУ-ын эрх бүхий байгууллагатай хамтран ажиллаж, мөрдөн байцаалтын ажиллагаанд дэмжлэг үзүүлж байгаа” хэмээн мэдэгдэл хийсэн. Гэвч түүнийг яг хаана байгаа талаар мэдээлэл өгөөгүй аж. Бао нь Morgan Stanley болон Credit Suisse-д банкны салбарт ажиллаж байгаад 2005 онд China Renaissance компанийг үүсгэн байгуулжээ.
Барууны хэвлэлүүдийн мэдээлж байгаагаар Ноён Бао ийн алга болсон нь Хятадын эрх баригчдын зүгээс технологийн тэргүүлэгч компаниудад дарамт үзүүлж буйн тод жишээ гэжээ.
Хятадад сүүлийн жилүүдэд ийм тохиолдол нэг биш удаа гарч буй. Жишээ нь, 2020 оны сүүлээр Али баба компанийн үүсгэн байгуулагч Жэк Ма төр засгийu шүүмжилснийхээ дараа мөн гурван сарын турш сураггүй болсон байдаг. Уг нь тэрбээр цахим төлбөр тооцооны компаниа зах зээл дээр гаргаж ирэхээр төлөвлөж байсан гэдэг.
Эх сурвалж: BBC