Уул уурхайн салбарын томоохон компаниудын нэг “Rio Tinto” ногдол ашгаа 46 хувиар буурууллаа. 2022 оны санхүүгийн жилд “Rio Tinto”-ийн санхүүгийн ихэнх үзүүлэлтүүд өмнөх оноос буурч, шинжээчдийн таамагт хүрээгүй байна.
Тухайлбал: нийт орлого нь 55.5 тэрбум ам.доллар болж, өмнөх оноос 13 хувиар буурчээ. Харин цэвэр ашиг нь 41 хувиар буурч, 12.4 тэрбум ам.доллар болсон байна. Гол түүхий эд, эрчим хүчний үнийн өсөлт, мөн инфляц өндөр байгаа зэрэг нь үйл ажиллагааны зардал өсөж, ашиг буурахад нөлөөлжээ.
Тус компани нэгж хувьцаанд 4.17 ам.доллар олгохоор тооцоолж байсан бол цэвэр ашгийн хэмжээ нь буурснаар үүнийгээ 46 хувиар бууруулж, 2.25 ам.доллар болгоод байна.
Үүнээс гадна “Rio Tinto” Канадад байрлах очир эрдэнийн уурхайг өргөжүүлэхэд 40 сая ам.доллар зарцуулахаар төлөвлөөд байгаа аж. Ингэснээр уурхайн үйл ажиллагаа явуулах хугацааг наад тал нь 2026 он хүртэл сунгах боломжтой гэж үзжээ. Саяхныг болтол зөвхөн ил уурхайгаас олборлолт хийж байсан бол үүнийг өргөжүүлж гүний уурхайгаас олборлолт хийхээр төлөвлөсөн байна.
