Сар шинийн баярын өдрүүдэд цаг агаар ямар байх талаар Цаг уур, орчны шинжилгээний газрын Урьдчилан мэдээлэх хэлтсийн дарга Л.Оюунжаргалаас тодрууллаа.
-Сар шинийн баярын өдрүүдээр цаг агаар ямар байх вэ?
-Одоогийн байдлаар сар шинийн баярын өдрүүдэд цаг агаар харьцангуй тогтвортой хүйтний эрч нэлээд их сулрахаар байна. Ялангуяа, шинийн 2 болон 3-ны өдрүүдэд өдөртөө ихэнх нутгаар дулаахан агаарын температур нэг оронтой тоо руу орж говийн бүс нутгаар +5...+10 хүрч дулаарах төлөвтэй байна.
Өдөр өдрөөр нь авч үзвэл 20-нд буюу битүүний өдөр Хангайн уулархаг нутаг, 21-нд буюу шинийн нэгэнд Хэнтэйн уулархаг нутгаар ялимгүй цас, 23-нд буюу шинийн 3-нд Монгол-Алтай, Хөвсгөлийн улархаг нутаг, Увс нуурын хотгор, Тэс голын хөндийгөөр цас орно. Шинийн 2-нд нийт нутгаар цас орохгүй.
Салхи 20-нд тал, хээрийн нутгаар, 23-нд баруун аймгуудын нутгаар секундэд 14-16 метр хүрч ширүүсэж, шороон шуурга шуурах төлөвтэй байна.
20, 21-нд Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө -33...-38 градус, өдөртөө -18...-23 градус, Хангай, Хөвсгөл, Хэнтийн уулархаг нутаг, Эг, Үүр, Хараа, Ерөө, Туул, Тэрэлж голын хөндийгөөр шөнөдөө -25...-30 градус, өдөртөө -9...-14 градус, говийн бүс нутгийн баруун өмнөд хэсгээр шөнөдөө -6...-11 градус, өдөртөө +1...+6 градус, говийн бүс нутгийн хойд болон зүүн хэсгээр шөнөдөө -10...-15 градус, өдөртөө -3...+2 градус, бусад нутгаар шөнөдөө -17...-22 градус, өдөртөө -3...-8 градус хүйтэн байна.
22, 23-нд Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө -29...-34 градус, өдөртөө -14...-19 градус, Хангай, Хөвсгөл, Хэнтийн уулархаг нутаг, Эг, Үүр, Хараа, Ерөө, Туул, Тэрэлж голын хөндийгөөр шөнөдөө -21...-26 градус, өдөртөө -6...-11 градус, говийн бүс нутгийн баруун өмнөд хэсгээр шөнөдөө -4...-9 градус, өдөртөө +5...+10 градус, говийн бүс нутгийн хойд болон зүүн хэсгээр шөнөдөө -8...-13 градус, өдөртөө 0...+5 градус, бусад нутгаар шөнөдөө -17...-22 градус, өдөртөө 0...-5 градус хүйтэн байх төлөвтэй байна.
-Ямар нэгэн онцгойлон сэрэмжлүүлэх зүйл бий юу?
-Шинийн 4-нд нутгийн хойд хэсгээр цас орж цасан шуурга шуурч болзошгүй байгаа тул хол замд гарахдаа цаг агаарын мэдээгээ дахин нягтлаад төлөвлөөрэй гэж зөвлөе.
-Хэр салхи шуургатай байх вэ?
-Энэ жилийн сар шинийн өдрүүдэд харьцангуй салхи шуурга багатай байна. Шинийн 4-нээс бусад өдрүүдэд гэж ойлгож болно.
-Орон нутгийг зорьсон иргэд 26-27-ны өдрүүдэд Улаанбаатар хотыг зорино. Энэ үеэр цаг агаар ямар байх вэ?
-Одоогоор энэ өдрүүдийн цаг агаарын төлөв тодорхой болоогүй байна. Одоогоор арай эрт байна. Өдөр бүр гарч байгаа цаг агаарын мэдээгээ тогтмол хүлээн авч хэрэглэж байгаарай.
-Хоёрдугаар сарын эхний 10 хоногийн цаг агаарын төлвийг өмнөх жилүүдийнхтэй харьцуулахад ямар байсан бэ?
-Ихэнх нутгаар олон жилийн дунджаас дулаан байсан байна. Харин 2022 оны 2-р сарн эхний 10 хоног олон жилийн дунджаас хүйтэн байсан байна. Өнгөрсөн жил цагаан сарын 2-р сарын эхэнд болсон. Тиймээс хүйтэндүү байсныг санаж байгаа байх.
-Энэ сард нийт нутгийг хамарсан цасан шуурга шуурах уу?
-Хоёрдугаар сарын урьдчилсан төлвөөр сүүлийн 10 хоногт говь, тал, хээрийн нутгаар харьцангуй салхитай байх хэдий ч ихэнх нутгийг хамарсан цасан шуурга шуурах магадлал бага байна.
