"Стандарт-хөгжил" сэдэвт уулзалт Блю Скай зочид буудалд өнөөдөр боллоо.
Уулзалтад Барилга, Хот Байгуулалтын Яам (БХБЯ), Хүнс, Хөдөө Аж Ахуй, Хөнгөн Үйлдвэрийн Яам (ХХААХҮЯ) болон бусад салбарын төлөөллүүд оролцов.
Энэ үеэр барилга байгууламжийн чанар стандарт, аюулгүй байдал ба газар хөдлөлтийг тэсвэрлэх үнэлгээг хийсэн эсэх талаарх сэтгүүлчийн асуултад БХБЯ-ны Бодлого төлөвлөлтийн газрын дарга Б.Гүнболд дараах хариултыг өгсөн юм.
Тэрбээр "Улаанбаатар хотын хэмжээнд 2015 онд нарийвчилсан бичил мужлалын зургийн масштаб хийгдсэн байдаг. Ингэснээр нийслэлийн нийт газар нутгийн хоёр хувь нь газар хөдлөлтийн 9 баллд байгааг тодорхойлсон. Ялангуяа, Сонгинохайрхан дүүргийн нутаг дэвсгэр газар хөдлөлтийн эрсдэлтэй бүсэд орж байгаа. Эмээлтийн хагарал гэж ярьдаг шүү дээ. Түүнчлэн газар хөдлөлтийн 8 баллд 50 орчим хувь нь байгаа бол 7 баллд 48 хувь нь байгаа талаарх үзүүлэлт бий. Энэ бол Улаанбаатар хотын мэдээлэл. Энэхүү нарийвчилсан мэдээллээс харж газар хөдлөлтийн бүсэд барилга, байшин төлөвлөх норм дүрмийг 2021 онд боловсруулж, баталсан байдаг. Ингэснээр тухайн баллд нь тааруулж, барилгын чанарт анхаарч, төлөвлөж байгаа гэсэн үг. Өөрөөр хэлбэл, газар хөдлөлтийн тухайн баллд нь тэсвэртэй байх барилгыг төлөвлөх нь маш чухал.
Дээр дурдсан норм, дүрмийн дагуу 9 ба түүнээс дээш баллын газар хөдлөх эрсдэлтэй бүсэд барилга төлөвлөхийг хориглож байгаа. Яагаад гэвэл, эдийн засгийн хувьд ач холбогдолгүй, эрсдэлтэй үйлдэл болно.
Бид газар хөдлөлтийн бичил мужлалын зургийг 21 аймгийн төвд үе шаттайгаар хийж байгаа. Одоогийн байдлаар есөн аймаг дутуу байна. Тухайлбал, зүүн бүсийн Дорнод, Сүхбаатар аймагт газар хөдлөлийн балл бага байна. Харин эсрэгээрээ Баян-Өлгий аймаг үзүүлэлт нь 9 баллтай гарч байгаа. Тиймээс газар хөдлөлтийн тэсвэрлэх чадварт нь нийцсэн барилга байгууламжийн зураг төслийг боловсруулах нь чухал" гэв.
