НҮБ-ын Ерөнхий нарийн бичгийн дарга Антонио Гутерриш Сирийн Ерөнхийлөгч Башар Асад дахин хоёр хилийн боомт нээхийг зөвшөөрсөн гэж мэдэгдэв. Ассад хүмүүнлэгийн тусламжийг цаг тухайд нь хүргэхийн тулд Сирийн баруун хойд хэсэгт орших Туркийн Баб аль-Салам болон Аль-Рай шалган нэвтрүүлэх боомтуудыг гурван сарын хугацаанд нээхээр тохиролцсон гэж Гутерриш тодотгов.
Газар хөдлөлт болохоос өмнө Сирийн баруун хойд нутгийн босогчдын хяналтад байгаа бүс нутгийн дөрвөн сая гаруй оршин суугчдад үзүүлэх хүмүүнлэгийн тусламж бараг бүхэлдээ Туркээс Баб аль-Хава хэмээх ганцхан шалган нэвтрүүлэх цэгээр дамжин ирдэг байсан юм.
Газар хөдлөлтийн улмаас амь үрэгдэгсдийн тоо нэмэгдсээр байгаа бөгөөд дайны хөлд нэрвэгдсэн Сири улсад амьд үлдсэн хүмүүс өвлийн хүнд нөхцөлд байгаа тул Гутерриш “Нөлөөлөлд өртсөн сая сая хүмүүст хоол хүнс, эмнэлгийн хэрэгсэл, хоол тэжээл, хамгаалалт, орон байр, өвлийн хангамж болон бусад амин чухал зүйлсийг хүргэх нь нэн яаралтай байна” гэж тэмдэглэв.
АНУ хилийн шинэ боомтууд нээгдсэнд баяртай байгаа бөгөөд үүссэн нөхцөл байдалтай холбоотойгоор Сирийн эсрэг тогтоосон хоригоо түр цуцлаад байгаа юм.
Сирийн баруун хойд хэсэгт орших Идлиб мужийг өмнө нь Аль-Кайдатай холбоотой байсан Исламист Хаят Тахрир аль-Шам бүлэглэл хянадаг. Тус бүлэглэл Аль-Кайдатай холбоогоо тасалсан ч ихэнх улсын засгийн газрууд түүнтэй ямар ч харилцаа тогтоодоггүй.
Саудын Араб, Катараас их хэмжээний тусламжийн бараа босогчдын хяналтад байгаа бүс нутагт НҮБ-ын хангамжаас өмнө ирж эхэлсэн байна. Тэрхүү тусламж шууд ирдэг учраас нэрвэгсдийн байдлыг өөрчилж чадна гэж үзэж байна.
Мягмар гарагт 35 тонн хүмүүнлэгийн тусламж ачсан Саудын Арабын онгоц Сирийн Алеппо хотод газарджээ. Энэ бол сүүлийн 10 гаруй жилийн хугацаанд Саудын Арабаас Сирид газардсан анхны онгоц" гэж албаны хүн тодотгожээ.
Түүнчлэн лхагва, пүрэв гаригт Саудын Арабаас хүмүүнлэгийн хоёр нислэг хийнэ гэж Тээврийн яам мэдэгдэв.
Тодотгоход Саудын Араб 2012 онд Башар аль-Асадын засгийн газартай харилцаагаа тасалж, дайны эхэн үед босогчдыг дэмжиж байсан юм. Гэсэн хэдий ч Эр-Рияд тус улсын гамшигт нэрвэгдсэн бүх бүс нутагт хэн хяналт тавьж байгаагаас үл хамааран тусламж үзүүлэхээ амлав.
104 тонн хүнс, брезент ачсан 11 ачааны машинаас бүрдсэн анхны тусламжийн цуваа бямба гарагт Идлиб рүү хөдөлсөн гэж Саудын Арабын албан ёсны хэвлэлийн агентлаг мэдээлэв.
Эх сурвалж: ВВС
