Европын холбооны тэргүүн Урсула ван дер Лейен Украины дайнтай холбогдуулан ЕХ-ны 10 дахь шинэ хориг арга хэмжээний багцад тусгагдсан гол арга хэмжээний талаар мэдээлэв.
Тэрбээр гурван үндсэн төрлийн хязгаарлалтыг нэрлэв. Үүнд:
- ОХУ-д худалдахыг хориглосон барааны жагсаалтыг өргөжүүлэх. Тухайлбал, цахилгаан хэрэгсэл, тусгай зориулалтын машин механизм, машины эд анги, ачааны машины эд анги, түүнчлэн Оросын цэргийнхэн ашиглаж болох барилгын салбарт шаардлагатай бараа бүтээгдэхүүн орж байна.
- Давхар хэрэглээний хосолмол зориулалттай техникийн эд ангиудыг экспортлохыг хориглох. Тодруулбал, ЕХ хориг арга хэмжээний багцад зэвсэг үйлдвэрлэхэд ашиглаж болох 47 төрлийн электрон эд ангиудыг оруулна. (Европын комисс Москвад камикадзе нисгэгчгүй онгоц нийлүүлдэг Ираны эсрэг хориг арга хэмжээ авахаа зарласан);
- Хувийн хориг арга хэмжээнд хамрагдах оросуудын жагсаалтыг өргөжүүлэх. Үүнд цэргийнхэн, суртал ухуулгын аппаратын ажилтнууд багтана.
Өмнө нь хэвлэл мэдээллийн хэрэгслээр Оросын өөр гурван банк хориг арга хэмжээний шинэ жагсаалтад багтаж магадгүй гэж мэдээлж байсан. Тэдгээр нь Альфа-банк, "Тинькофф" болон Росбанк нэрлэгдэж байсан юм.
Оросууд Украиныг эзлэн түрэмгийлсний нэг жилийн өдрөөр Оросын эсрэг авах хориг арга хэмжээний арав дахь багцыг Европын холбоо батлах төлөвтэй байна.
Эх сурвалж: ВВС
