2023 оны 1-р сарын 14-нд Хонгконг-д Азийн бүсийн оюутны программчлалын 46-р олимпиад зохион байгуулагдаж дүнгээ гаргалаа. Тус олимпиадад ХШУИС-ийн багш Г.Багаболд дасгалжуулагчтай ХШУИС-ийн оюутан Э.Жангар, Б.Бат-эрдэнэ, ШУС-ийн оюутан Б.Хангал нарын бүрэлдэхүүнтэй NUM-JBKH баг оролцож мөнгөн медаль хүртсэн бахдам сайхан амжилт үзүүллээ.
Цар тахлын нөхцөл байдал хүнд хэцүү байгаа тул зохион байгуулагч орны зүгээс 91 багаа өндөр хяналтын доор онлайнаар хүлээн авч оролцуулсан бөгөөд дэлгэцийн 5 цагийн бичлэг, тал, урд хойд камер, панорама камер зэргийг урт хугацааны турш хянан үзэж шалгаруулалтаа явуулснаараа онцлог байлаа.
Манай NUM-JBKH баг тус уралдаанд оролцохдоо оролцогч бусад бүх багаас хамгийн түрүүнд 4 минутад эхний бодлогоо шийдвэрлэж МУИС-ийнхаа эрхэм нэрийг өндөрт өргөж монгол хүний оюуны нэгэн шинэ нэн хэрэгтэй программчлах өндөр ур чадвартайгаа харуулсан гайхалтай амжилтын эзэд болцгоолоо. Мөн багш Г.Багаболд нь 12 жилийн өмнө Далиан хотод болсон олимпиадад МУИС-ийнхаа багийг мөн удирдан оролцож мөнгөн медаль хүртэж байсан тул хошой мөнгөн медальт дасгалжуулагч багш болж энэхүү олимпиадаар амжилтаа давтлаа.
