IHC-ийг зах зээлд гаргасан таван хүнээс О.Мөнхжин, Б.Эрхэмбаяр, Б.Гантиг нарыг мөрдөн байцаасан билээ. Мөрдлөгийн хүрээнд тэднийг 461 дүгээр хорих ангид 48 цаг саатуулж, үргэлжлүүлэн хорих саналыг прокуророос шүүхэд гаргасан. Тэднийг Эрүүгийн хуулийн тусгай ангийн 18.19 дүгээр зүйлийн 2 дахь хэсгийн 2.1, 2.2 дахь заалтад тус тус заасан гэмт хэрэгт холбогдуулан яллагдагчаар татсан юм.
Харин Сүхбаатар дүүргийн Эрүүгийн хэргийн анхан шатны шүүхээс мөрдөгч, прокурор нь Эрүүгийн хэрэг хянан шийдвэрлэх тухай хуулийг ноцтой зөрчсөн гэж үзэж, саналыг хүлээж аваагүй аж. Харин эрүүгийн хэрэг хянан шийдвэрлэх ажиллагааны явцад санаатай саад учруулахгүй байх, яллагдагч эрүүгийн хэрэг хянан шийдвэрлэх ажиллагаанд саад учруулахгүй байх үүднээс тэднийг Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авч шийдвэрлэсэн.
Тэгвэл өнөөдөр \хоёрдугаар сарын 14\ О.Мөнхжин өөрийгөө зохион байгуулалттай гэмт хэрэгт буруутгагдсан хэмээн фейсбүүк хаягаараа дамжуулан лайв хийлээ. Тэрээр “Отгонбаатарын Мөнхжин намайг өнөөдөр цагдан хорих шүүх хурлаар гуравдах удаагаа орууллаа. Манай өмгөөлөгчид “Сүүлийн 20 жилийн хугацаанд эрүүгийн хэрэг өмгөөлж байхад 10 хоногийн дотор гурван удаа таслан сэргийлэх, цагдан хорих шүүхээр орсон хүн байхгүй тийм зүйл тохиолдож байгаагүй” гэв. Өнөөдөр цагдан хорих шүүх хурлаар оруулж намайг 30 хоног цагдан хорих шийдвэр гаргажээ. Энэ бол шалгагдаад гэм буруутай болоод хорино гэсэн үг биш. Хэрэг шалгагдаж байхад ямар нэг шалтгаан гаргаж, намайг цагдан хорино. Энэ нь 30, 30 хоногоор гээд бүтэн жилийн турш үргэлжлэх боломжтой юм байна. Өмнөх долоо хоногт надад хилийн хориг тавьж, цагдан харих шаардлагагүй гэж үзсэн. Гэвч өнөөдөр шүүгч нь солигдоод, шалтгаан гаргаад намайг 30 хорих шаардлагатай болсон гэнэ. Би энд үнэхээр харамсаж байна. Намайг гэм буруутай эсэхийг шалгах биш, “Их Бит”-ийн гурвыг л цагдан хорих сонирхолтой байна. 100 хувь баталгаажлаа.
Зүгээр ажлаа хийж байсан хүмүүс зохион байгуулалттай хэргийн золиос боллоо. Яагаад гэвэл баахан хэвлэл мэдээллийн хэрэгслээр сэвж, хачин, хачин сайтаар биднийг цахимаар ялласан. Тэгсэн атлаа мөрдөн байцаах явцын нууц мэдээллийг өөрсдөдөө задалсан. Биднийг 48 цаг хорьсноо араас нь 30 хоног сунган хорих гэсэн нь бүтээгүй. Би долоо хоног сул чөлөөтэй явж байгаад гэм буруугүй байж хоригдохоор боллоо. Анх биднийг хоёрдугаар сарын 1-нд шалгахдаа залилан мөн угаасан гэж шалгасан. Байцаалт авч, гэр орон, оффис нэгжсэн. Тэд бодохдоо миний гэрээс баахан бэлэн мөнгө гарч, сенсац тарина гэж бодсон байх. Би зүгээр л ажлаа хийж яваа залуу. Яагаад намайг ингэж байгаа юм" хэмээв.