БНСУ-д хууль бус оршин суугчдын тоо эрс нэмэгдсээр байгаа билээ. Үүнтэй холбоотойгоор тус улсын Засгийн газар цар тахлын үеэр түр зогсоогоод байсан хууль бусаар амьдарч буй гаднын иргэдийг баривчлах, албадан гаргах ажлыг дахин хэрэгжүүлж эхэлсэн юм.
Т022 оны жил эцсийн байдлаар хууль бусаар оршин суугч 411 мянга орчим хүн бий гэх урьдчилсан тооцоог гаргасан байна.
Сүүлийн 10 жилийн хугацаанд хууль бус оршин суугчдын тоо хэрхэн нэмэгдсэнийг доорх графикт харуулъя.
10 жилийн өмнөхтэй харьцуулахад 2.3 дахин өссөн байна. Энэ удаагийн баривчилгаагаа хоёрдугаар сарын 1-нээс гуравдугаар сарын 31 хүртэл үргэлжилнэ. Энэ нь цар тахлын дараах хоёр дахь удаагийнх бөгөөд эхнийх нь нэлээдгүй үр дүнтэй болсон хэмэээ холбогдох албаныхан үзэж байгаа юм.
Зөвхөн "харласан" иргэдийг бус ажиллах эрхгүй ч ажил хийж буй бол энэ баривчилгаад хамаарах ажээ. Тухайлбал, аяллын виз, мөн сурахаар очсон ч хууль бусаар ажиллаж байгаа гэх мэт хүмүүсийг хамруулж байгаа аж.
Өмнөд Солонгост энэ оны нэгдүгээр сараас хэрэгжиж буй шинэ хуулийн заалтын дагуу хууль бусаар ажил хийсэн оюутан сурагчдыг цагаан хуудас өгч, хилээр гаргаж байгаа аж. Тус улсын Гадаадын иргэний харьяатын газраас албан ёсны мэдэгдэл гаргасан байна.
Тус улсад албан ёсны эрхтэйгээр амьдарч буй D2, D4, D10 визтэй бүх иргэд ажил хийсэн тохиолдолд заавал зөвшөөрөл авах шаардлагатай ажээ. Тиймээс цэнхэр үнэмлэхээ хэн нэгэнд хэрэглүүлэхгүй байхыг онцгойлон сануулсан байна.
Гадаадын иргэн харьяатын газар Өмнөд Солонгосын Татварын ерөнхий газартай хамтран гадаад иргэдийн татвар төлсөн мэдээллийг шууд харах эрхтэй болжээ. Тиймээс иргэдийн татвар төлсөн баримтаар таны орлогыг хянах аж. Дансны төрлийг төрөл бүрээр нь харахаас гадна хэрэв татвараас зугатаахыг оролдох, давхар орлогын татвар тооцуулаагүй бол гадаад иргэдийн визийг сунгахгүй байх эрсдэл үүсэж болзошгүй юм байна.
Эргэн сануулахад 2022 оны арав, арваннэгдүгээр сард зохион байгуулсан баривчилгааны үеэр 10 гаруй мянган хууль бус цагаачдыг албадан болон сайн дурын үндсэн дээр нуцаг буцаасан байдаг. Үүний 165 нь монгол иргэн байсан билээ.
