Газар хөдлөлтөөс хойш 6 хоногийн дараа амьд хүн олж аврах найдвар багассаар байна. Түүнчлэн Туркийн эрх баригчид нурж унасан өндөр барилгуудыг барьж байгуулсан хүмүүсийг баривчилж эхэлжээ.
Амь үрэгдэгсдийн тоо аль хэдийн 35 мянга даваад байгаа бөгөөд үүний 3.5 мянга нь Сирид байна. НҮБ амь үрэгдэгсдийн тоо үүнээс хоёр дахин их байх магадлалтай хэмээн тооцож байна.
Туркийн эрх баригчид газар хөдлөлтийн идэвхтэй бүсэд нурж унасан барилгуудын шалтгааныг нягтлах явцад 130 сэжигтэй зөрчил илрүүлсэн бөгөөд ийм шалтгааны улмаас өндөр барилгууд эхний чичиргээнээр нурж унасан гэж үзэж байна.
Эрх баригчид гамшигт нэрвэгдсэн 10 мужийн 170,000 барилгыг шалгасны дараа 25,000 байшин барилга бүрэн сүйрсэн гэж мэдэгдэв. Үүнттэй холбоотойгоор Прокуророос 113 баривчлах захирамж гаргаад байна. Ням гарагийн өглөө 12 хүнийг баривчилжээ.
Харин сөрөг хүчний зүгээс энэхүү баривчлах ажиллагааг эрх баригчид өөрсдийн бурууг барилгачид руу чихэж, уурлаж бухимдсан иргэдийн анхаарлыг өөр тийш хандуулах гэсэн оролдлого гэж үзэж байна.
Сөрөг хүчнийхний үзэж байгаагаар, Ерөнхийлөгч Режеп Эрдоганы засаглалын 20 жилийн хугацаанд эрх баригчид барилгын норм дүрэм зөрчиж байсныг нүдээ аниад өнгөрөөдөг байсан гэжээ. Түүнчлэн 1999 онд болсон газар хөдлөлтийн дараагаас барилга байгууламжийн газар хөдлөлтөд тэсвэртэй байдлыг сайжруулах зорилгоор тусгай татвар хэлбэрээр цуглуулсан мөнгийг зориулалтын бусаар зарцуулсан гэж шүүмжилж байна. .
Тавдугаар сард болох ерөнхийлөгчийн болон парламентын сонгуулиар хүндхэн байгаа Эрдоган энэ мэдээллийг үгүйсгэж, хотын захиргаа дахь сөрөг хүчний авлигач албан тушаалтнууд буруутай гэж мэдэгджээ.
Тэрээр эмгэнэлт явдал болсон газруудын нэгэнд зочлох үеэрээ "Иймэрхүү зүйл үргэлж тохиолдож байсан. Хувь тавилан өөрийн гэсэн төлөвлөгөөтэй байдаг" гэж хэлжээ.
Эх сурвалж: ВВС
