Бетон зуурмаг бол барилгын гол дүүргэгч материалын нэг хэсэг. Энэ асуудлыг мэргэжлийн хүн сүүлийн жилүүдэд нэлээн ярьж, хэлж байсан ч бодлого гаргах түвшинд үл ойшоосон юм. Харин сая Туркэд болсон газар хөдлөлтийн улмаас олон хүн барилгын нурангид дарагдаж, дэлхий даяараа барилгын чанарын асуудалд анхаарал хандуулж эхлээд байна.
Олон улсын шинжлэх ухааны хэллэгт чанаргүй барилга байгууламж барихыг “Хүн төрөлхтөнийг инженерийг барилга байгууламжаар нөлөөлүүлж, үй олноор нь устгах арга” гэж нэрлэдэг тухай барилгын инженер Ж.Баяраа ярьж байв.
Тиймээс ч энэ асуудлаар судалгаа шинжилгээ хийж, сүүлийн жилүүдэд баригдаж байгаа барилгуудад үзлэг хийж, зургаар баримтжуулан холбогдох байгууллагуудад удаа дараа мэдэгдэж, баримтуудыг хүргүүлсэн байдаг. Тодруулбал 2019 оноос хойш барилгын чанарын асуудлаар Барилгын яам, Барилгын хөгжлийн төвөөс эхлээд Үндэсний аюулгүй байдлын зөвлөл хүртэл тасралтгүй бичиг хүргүүлж анхааруулсаар ирсэн юм. Гэвч энэ асуудлыг холбогдох байгууллагууд үл тоосон байдаг.
Тэнэгийн дотор уужуу гэгчээр Турк улсад болсон байгалийн гамшигт үзэгдэл тохиолдож олон мянган хүн чанаргүй барилгын нурангид дарагдаж, амь насаа алдсан шиг үйл явдлыг үзэхээс нааш энэ асуудалд хэн ч анхаарахгүй бололтой.
Ж.Баяраа “… энэ орон сууцны хорооллын барилгуудад үүссэн ан цав, хагарал, цуурал гэмтлүүд нь ямар нэгэн газар хөдлөхгүй тохиолдолд 3-7 жилийн настай, хэрвээ 2-3 баллын чичирхийлэлд өртсөн тохиолдолд ашиглах ямар ч боломжгүй болж, 3-аас дээш баллын газар хөдлөлтийн чичирхийлэлд нэрвэгдсэн тохиолдолд тухайн орон сууцны барилгууд дотроос ард иргэд амь насаа аврах ямар ч боломжгүй байна” гэж 2019 онд Шадар сайдаар ажиллаж байсан Ө.Энхтүвшинд мэдэгдэл хүргүүлэхдээ бичиж байжээ.
Ингээд Инженер Ж.Баяраагийн зөвшөөрлөөр түүний баримтжуулсан зургуудаас нэгтгэн үзэгч та бүхэнд хүргүүлж байна. Сүүлийн үед баригдсан 300 гаруй барилгын ан цав, эвдрэл үүссэн зургуудыг баримтжуулан хүргэсэн байдаг.
Инженер Ж.Баяраагийн шат шатны байгууллагад өгсөн албан бичиг, нотлох баримтаар хүргүүлсэн зургууд хаана, хэнд очоод нам дарагдсан бэ. Энэ бол Монголчуудын амь нас, эрүүл мэнд, эдийн засгийн аюулгүй байдалд эрсдэл учруулж байгаа гэмт хэргийн ноцтой нотлох баримтууд юм шүү. Барилгын чанар стандартын асуудлыг мэргэжлийн хүмүүс ярьж хэлсээр байтал 2019 оноос хойш хэдэн барилга баригдаж, хичнээн хүний амь нас, эрүүл мэнд, санхүүд эрсдэл учруулж байгаа бол...
Б.Ирээдүй
