Турк, Сирид болсон газар хөдлөлтийн улмаас амиа алдагсдын тоо бямба гарагийн орой гэхэд 28 мянгаас давжээ. Амьд үлдсэн хүмүүсийг эрэн хайх ажиллагаа үргэлжилж байгаа ч Туркт ажиллаж байгаа Герман, Австрийн аврагчид гамшгийн бүсэд дээрэм, буудалцаан болсны улмаас ажлаа түр зогсоожээ.
Туркийн Шадар сайд Фуат Октай сэтгүүлчдэд мэдээлэхдээ, тус улсад амиа алдагсдын тоо 24,617-д хүрсэн байна гэв. Харин Франс Пресс агентлагийн Сири улсад одоогийн байдлаар 3553 хүний цогцсыг олоод байна. Ингэснээр хоёр улсын нийт нас барсан хүний тоо 28,100 гаруй болж байна.
Мэдээллийн агентлагуудын мэдээлснээр, бямба гаригт Туркийн Газиантеп мужид газар хөдлөлт болсноос хойш тав хоногийн дараа эцэг эх, хоёр охин, нэг хүү гэсэн таван хүнтэй гэр бүл нурангаас гарсан байна. Газар хөдлөлтийн голомттой ойрхон бүс нутагт сүйрсэн байшиндаа энэ гэр бүл нь азтай тохиолдлоор амьд үлджээ.
Мөн Хатай мужид газар хөдлөлт болсноос хойш бараг 132 цагийн дараа долоон настай охиныг нурангин доороос аварсан тухай AP агентлаг мөн бямба гарагт мэдээлэв.
Гэвч зарим газар аврагчид өөрсдөө эосдэлтэй нөхцөл байдалд оржээ. тодруулбал, Германы Олон улсын эрэн хайх, аврах алба (ISAR) болон Германы техникийн туслалцааны холбооны агентлаг (THW) болон бусад зарим байгууллага Туркийн өмнөд хэсэгт аврах ажиллагаагаа түр зогсоолоо.
ISAR-ын хэвлэлийн төлөөлөгч Стефан Хайне "Тус бүс нутагт бүлэглэлүүдийн хооронд мөргөлдөөн болсон тухай мэдээлэл байгаа бөгөөд буун дуу сонсогдсон" гэж тайлбарлав.
Туркийн эрх баригчид мөргөлдөөн, буудалцаан болсныг мэдээлээгүй ч Ерөнхийлөгч Режеп Тайип Эрдоган өнгөрсөн бямба гарагт газар хөдлөлтөд нэрвэгдсэн бүс нутагт дээрмийн хэрэг гарсныг хүлээн зөвшөөрч, арга хэмжээ авна гэдгээ мэдэгдэв.
Эх сурвалж: ВВС
