
Өнгөрсөн даваа гарагт Турк, Сири улсуудад болсон хүчтэй газар хөдлөлтөд амь үрэгдсэн хүний тоо 33 000 давсан бөгөөд энэ тоо цаашид хоёр дахин нэмэгдэж болзошгүй хэмээн албаныхан эмээж буй.
Туркийн эрх баригчид чанаргүй барилга барьсан барилгын компаниуд, туслан гүйцэтгэгчид, хүлээн авсан мэргэжлийн хяналтын албаны 113 хүнийг баривчилж, хатуу шийтгэл оноох шийдвэр гаргасан байна. Одоогоор барилгын гэрээ байгуулагчид, архитектур, инженер зэрэг 12 хүнийг баривчилжээ.
Олон хүний амь үрэгдэхэд хүрсэн чанаргүй барилга барьсан этгээдүүдийн хэргийг шүүхээр шийдвэрлэнэ гэдгийг Туркийн Дэд Ерөнхийлөгч Фуат Октау мэдэгдсэн байна. Прокурорууд нотлох баримт болгож барилгын ажилд ашигласан материалын дээжийг нурсан барилгуудаас цуглуулж эхэлжээ.
Туркийн Байгаль орчны сайд Мурат Курумын мэдэгдсэнээр газар хөдлөлтийн үеэр 25 мянга орчим барилга бүрэн болон их хэмжээний гэмтэл авч сүйдсэн байна.
Харин Туркийн сөрөг хүчнийхэн Ерөнхийлөгч Режеп Тайип Эрдоганы засгийн газрыг барилгын дүрэм журмыг мөрдүүлж хяналт тавиагүйн улмаас олон мянган иргэн амиа алдахад хүрсэнд буруутгаж байгаа юм.