Монгол Улсын Ерөнхий сайд Л.Оюун-Эрдэнийн БНСУ-д хийх албан ёсны айлчлал өнөөдөр эхэллээ. Энэ нь Ерөнхий сайд Л.Оюун-Эрдэнийн гадаад улс оронд хийж буй албан ёсны гурав дахь айлчлал юм. Тэрээр өмнө нь Сингапур, ХБНГУ-д албан ёсны айлчлал, Япон, Их Британи, БНХАУ, ОХУ-д тус тус ажлын айлчлал хийсэн.
Энэ удаагийн Ерөнхий сайдын БНСУ-д хийж буй айлчлал нь хоёр улс 2021 онд стратегийн түншлэлээ өргөжүүлэхээр тохиролцсоны дараах дээд хэмжээний айлчлал юм. Түүний айлчлал дөрвөн шөнө, таван өдөр үргэлжилнэ.
Ерөнхий сайд Л.Оюун-Эрдэнэ БНСУ-ын Ерөнхийлөгч Юн Сог Ёль, БНСУ-ын Үндэсний Ассамблейн дарга Ким Жин Пё нарт бараалхаж, БСНУ-ын Ерөнхий сайд Хан Дог Сү-тэй албан ёсны хэлэлцээ хийх аж.
Ерөнхий сайдын айлчлалын хүрээнд яригдах хоёр сэдвийг энд онцолъё.
Нэг. Газрын ховор элемент
Ерөнхий сайд Л.Оюун-Эрдэнэ гадаадад хийх айлчлалынхаа ярианы сэдэвт газрын ховор элементийг ихээхэн ярих болсон. Өнгөрсөн онд Ерөнхий сайд Герман болон Сингапур улсад албан ёсны айлчлал хийхдээ бизнес эрхлэгчидтэй энэ сэдвээр ярилцаж, хөрөнгө оруулагчдын анхаарлыг татах болсон. Тэгвэл Өмнөд Солонгост ч газрын ховор металлын сэдэв анхаарлын төвд байх нь. Ерөнхий сайдын айлчлалын албан мэдээнд Солонгосын талтай газрын ховор элемент, хагас дамжуулагчийн түүхий эд нийлүүлэх зэрэг чиглэлд үр ашигтай санал солилцохоор төлөвлөж байгааг дурдсан байв.
Монгол Улсын Засгийн газар БНСУ-ын буцалтгүй тусламжаар Монголд Газрын ховор элементийн хамтарсан судалгааны төв байгуулахаар болсон. Талууд Ерөнхий сайдын айлчлалын үеэр албан ёсоор баталгаажуулах хүлээлттэй байна. БСНУ-ын талаас газрын ховор элемент, хагас дамжуулагчийн түүхий эд нийлүүлэхэд Монгол Улстай хамтран ажиллах сонирхлоо удаа дараа илэрхийлжээ. Түүнчлэн, саяхан хувийн хэвшлээс "Моннис" групп Өмнөд Солонгосын “Korea Telecom” компанитай газрын ховор элементийн хайгуул, олборлолтын чиглэлд хамтран ажиллахаар болоод байгаа юм.
Хоёр. Визний хөнгөлөлт
БНСУ-ын Гадаад хэргийн сайд Пак Жин 2022 оны наймдугаар сард Монгол Улсад албан ёсны айлчлал хийсэн. Энэ үеэр монгол иргэдийг БНСУ-д визгүй зорчуулах асуудлаар хоёр тал хамтран судалж, визний нөхцөлийг хөнгөвчлөх, хэтдээ харилцан визгүй зорчих чиглэлд онцгойлон анхаарч, хамтран судалж Ажлын хэсэг байгуулахаар болсон юм. Тэгвэл Монгол Улсын Ерөнхий сайд Л.Оюун-Эрдэнийн айлчлалаар эл асуудлыг дахин хөндөж, тодорхой тохиролцоонд хүрэх хүлээлттэй байна. Манай талаас монгол иргэдийг БНСУ-д визгүй зорчуулах, хөнгөвлөх асуудлаар хэд хэдэн хувилбартай санал бэлдэж байгааг Гадаад харилцааны сайд Б.Батцэцэг онцолсон. Үүнд,
-Аялал жуулчлалын зорилгоор хоёр улсын иргэд харилцан адил зарчим баримтлан визгүй зорчуулах
-Эмчилгээний зорилгоор БНСУ-ыг зорьж байгаа монгол иргэдийг визгүй зорчуулах,
-Бизнесийн болон бусад шалтгаанаар олон удаа БНСУ руу зорчдог иргэдийг визгүй болгох зэрэг асуудал багтаж буй.
Түүнчлэн, Ерөнхий сайд Л.Оюун-Эрдэнэ Монгол, Солонгосын Бизнес форумын нээлтийн ажиллагаанд оролцон үг хэлэх бөгөөд тус улсын томоохон компаниуд, банк санхүүгийн байгууллагын удирдлагатай уулзалт хийхээр төлөвлөсөн байна.
Мөн БНСУ-д оршин суугаа монгол иргэдийн төлөөлөлтэй уулзаж, Шинэ сэргэлтийн бодлогоо танилцуулна.