Газар хөдлөлтийн улмаас Турк болон Сири улсад амиа алдсан иргэдийн тоо 21 мянга даваад байна
Дэлхийн банк Турк улсад 1.78 тэрбум ам.долларын тусламж үзүүлэхээ зарлалаа. Дэлхийн банк тус улсад орон нутгийн түвшинд дэд бүтцийг сэргээх хоёр төсөлдөө 780 сая ам.долларын яаралтай тусламж өгөхөөр болсон байна. Мөн гамшигт өртсөн иргэдэд дэмжлэг үзүүлэх хүрээнд нэг тэрбум ам.долларын санхүүжилт төвлөрүүлж байгаа юм.
Турк болон Сири улсад газар хөдлөлтийн улмаас амиа алдсан иргэдийн тоо 21 мянга даваад байгааг албаныхан мэдээллээ. Сүүлийн байдлаар гэмтэж, бэртсэн хүний тоо нийт 78 мянга 124 болоод байна.
Гамшгийн эсрэг хариу арга хэмжээнд тодорхой хэмжээний алдаа дутагдал гарсныг Туркийн Ерөнхийлөгч Режеп Тайип Эрдоан хүлээн зөвшөөрсөн юм. Харин одоо нөхцөл байдал бүрэн хяналтад байгааг тэрбээр онцолжээ.
Олон улсын үнэлгээний “Fitch Ratings” агентлаг газар хөдлөлтийн дараах даатгалд хамруулах боломжтой эдийн засгийн хохирол дөрвөн тэрбум гаруй ам.доллартой тэнцэхээр байгааг тооцоолсон байна. Даатгагдсан хохирлын хэмжээ нэг тэрбум ам.доллар орчим байна гэж таамаглажээ. Хэдий тийм боловч олон шинэ мэдээлэл гарсаар байгаа учир тооцоолол хийхэд хүндрэлтэй байгааг онцолсон байна.
Газар хөдлөлтийн уршиг Турк улсын эдийн засагт 819 тэрбум ам.доллартой дүйцэх сөрөг үр дагавар учруулна гэж шинжээчид таамаглаад байгаа аж.
Пүрэв гарагт НҮБ-ын анхны тусламжийн баг Сири улсад очоод байна. Барууны орнуудын хориг арга хэмжээнүүдийн улмаас Сирид тусламж хүргэх явц удаашралтай байгаа юм.
