Оросын эзлэн түрэмгийлэгчид 1800 танк, 3950 хуягт машин, 2700 их бууны систем, пуужингийн 810 систем, 400 сөнөөгч онгоц, 300 нисдэг тэргийг Украинд шинэ довтолгоонд зориулан бэлэн болгоод буй тухай “Ukrayinska Pravda” сонинд мэдээлжээ.
Украины албаны хүмүүсийн тооцоолсноор тус улс дахь Оросын цэргийн хүчний тоо 300 мянгаас давсан байна. Энэ нь ОХУ-ын Ерөнхийлөгч Владимир Путин өнгөрсөн оны хоёрдугаар сард Украин руу түрэмгийлж байснаас хамаагүй олон байгаа бөгөөд энэ удаад тэд Украины зүүн хэсэгт ихээхэн ач холбогдол өгч байгааг уг сонинд онцолжээ.
АНУ-ын цэргийн өндөр албан тушаалтны хэлснээр, Бахмут, Соледар хотод үргэлжилсэн тулалдаанд учирсан хохирлыг нөхөхийн тулд Кремль олон мянган цэргээ илгээж эхэлсэн гэж Пентагон үзэж байгаа аж.
Нэрээ нууцалсан АНУ-ын цэргийн өндөр албан тушаалтан "Энэ удаагийн довтолгоо нь эхнийхээс өргөн хүрээг хамарна. Тэд хүний амь нас, хохиролд анхаарал хандуулахгүй. Ирэх 10 хоногт Оросын дайралт улам эрчимжинэ” гэжээ.
Украины Батлан хамгаалахын сайд Олексий Резников хоёрдугаар сарын 24-нд халдлага үйлдсэний ой тохиож байгаатай холбогдуулан Оросын цэргийн ажиллагаа нэмэгдэнэ гэж найдаж байгаагаа мөн мэдэгджээ. Шинжээчид болон Украины албаныхан Оросын дайралт Украины зүүн хэсэгт чиглэнэ гэж найдаж байна.
