
Хятадын агаарын бөмбөлөгийг харваж устгаснаас хойш долоо хоногийн дараа АНУ-ын агаарын орон зайд дахин ажиглагдсан нисдэг биетийг устгажээ. Энэ удаад Аляскийн дээгүүр өндөрт нисч явсан суудлын автомашины хэмжээтэй үл мэдэгдэх объектыг буудаж унагасан байна. Цагаан ордны хэвлэлийн төлөөлөгч Жон Кирби тухайн объектийн чиг үүргийн талаар ямар нэг мэдээлэл өгөөгүй бөгөөд зөвхөн иргэний агаарын тээвэрт аюул учруулсан тул унагасан гэжээ.
АНУ-ын албаны хүмүүс уг объектын гарал үүсэл, биет байдлын талаар тодорхой юу ч хэлж чадахгүй байна гэж Кирби хэлэв. Гэхдээ энэ нь үүний өмнө буудаж устгасан эрх баригчдын Хятадын тагнуулын хөтөлбөрийн нэг хэсэг гэж үзэж байгаа агаарын бөмбөлөгөөс хамаагүй бага хэмжээтэй байна.
Тодруулбал, өмнөх долоо хоногийн бямба гарагт Өмнөд Каролинагийн эргийн ойролцоо унагасан Хятадын агаарын бөмбөлөг 60 метрийн диаметртэй байсан гэж мэдээлж байсан юм.
Аляскийн эргийн ойролцоо унагасан уг объектыг Пүрэв гарагт Аляскийн зүүн хойд хэсэгт, Канадтай хиллэдэг нутгийн ойролцоо ниёч байгааг тагнуулын алба олж харсан байна.
Кирбигийн хэлснээр нисгэгчид уг объектыг шалгаж үзээд дотор нь хүн байхгүй гэсэн дүгнэлтэд хүрсэн байна.
"Үл мэдэгдэх биет 40,000 фут [ойролцоогоор 12 км] өндөрт нисч байсан бөгөөд иргэний агаарын тээвэрт тодорхой хэмжээний аюул учруулах эрсдэлтэй байсан" гэж Цагаан ордны хэвлэлийн төлөөлөгч мэдэгдэв.
Баасан гарагт ерөнхийлөгч Байдены заавраар орон нутгийн цагаар 13:45 цагт F-22 сөнөөгч онгоцоор буудан унагаахаас өмнө цэргийнхэн уг объектыг 24 цагийн турш ажигласан байна.
Эх сурвалж: ВВС