Монгол Улсын Байгаль орчин, аялал жуулчлалын яамны мэдээгээр 2019 онд тус улс 577.3 мянган гадаадын жуулчин хүлээн авсан бөгөөд үүний 30 гаруй хувь нь Хятадаас ирсэн хүмүүс байв. Сүүлийн үед Хятад улс COVID-ийн эсрэг бодлогодоо өөрчлөлт оруулсны дараа Монголын аялал жуулчлалын салбарынхан энэ онд Хятадын жуулчдын тоо мэдэгдэхүйц нэмэгдэнэ гэж найдаж байна.
Монголын аялал жуулчлалын холбооны ерөнхийлөгч Дамбын Гантөмөр саяхан Синьхуа агентлагт өгсөн ярилцлагадаа, Засгийн газраас COVID-19 тахлын дараа аялал жуулчлалыг хөгжүүлэх чиглэлээр олон арга хэмжээ авч, 2023-2025 оныг Монгол Улсад айлчлах жил болгон зарлаж байна гэв.
Монгол Улс ойрын жилүүдэд гадаадын нэг саяас доошгүй жуулчин татаж, аялал жуулчлалаас нэг тэрбум ам.долларын орлого олох зорилготой байгаа бөгөөд энэ зорилгод хүрэхэд Хятадын жуулчид ихээхэн хувь нэмэр оруулна гэдэгт итгэлтэй байгаагаа илэрхийлэв.
"Бид ойрын жилүүдэд Хятадаас аль болох олон жуулчин татахын тулд маркетингийн стратегиа сайжруулж байна. Хятадын олон жуулчид манай орны нүүдэлчин ахуй, онгон байгаль, байгалийн үзэсгэлэнт газруудтай танилцах аялал захиалж байна" гэж Монголын тур операторын захирал Жаргалын Пүрэвсүрэн хэллээ.
Бизнес эрхлэгч бүсгүйн хэлснээр одоогоор манай улсад Хятадаас жуулчид татдаг, монголчуудыг Хятад руу илгээдэг аялал жуулчлалын 50-иас доошгүй агентлаг байдаг аж.
Эх сурвалж: Синьхуа
