Лхагва гарагт Лондон, Парист айлчилсан Украины Ерөнхийлөгч Владимир Зеленский Брюссель хотыг зорьж, Европын парламентын танхимд түүнийг алга ташилтаар угтав.
Зеленский Европын парламентын гишүүдэд хандан хэлэхдээ, Оростой тулалдсанаар Украин зөвхөн өөрийгөө төдийгүй Европыг бүхэлд нь, Европын амьдралын хэв маягийг хамгаалж байна гэж хэлэв.
Францын ерөнхийлөгч Эммануэль Макрон Зеленскийн хамт Брюссель рүү ниссэн бөгөөд Украин түүний дэмжлэгт найдаж болно гэдгийг өмнөх өдөр нь баталж, Франц "Украиныг ялж, хууль ёсны эрхээ сэргээхэд нь туслана" гэж мэдэгджээ.
Германы канцлер Олаф Шольц үүнтэй төстэй мэдэгдэл хийж, Украины дайнд Орос ялахыг зөвшөөрөх ёсгүй гэж онцолжээ.
Европын зөвлөлийн ерөнхийлөгч Чарльз Мишель Зеленскийг Брюссельд угтан авахдаа "Гэртээ, ЕХ-нд тавтай морил" гэж твиттер хуудсандаа бичжээ.
"Брюссель бол Украины харьяалагддаг Европын гэр бүлийн зүрх" гэж Урсула фон дер Лейен нэмж хэлэв. Еврокомиссын тэргүүн "Бид Украиныг алхам бүрт дэмжих болно" гэжээ.