“Бид ориловч, төр дүлий!” сэдвээр хүүхдийн мөнгөө авч чадаагүй ээжүүдийн төлөөллөөс мэдээлэл хийлээ.
Ээжүүдийн төлөөлөл" Хүүхдийн мөнгийг төр засгаас алагчилж өгөхөөр шийдвэрлэсэн. Иймд хүүхдийн мөнгийг авч чадахгүй байгаа есөн хувьд багтсан ээжүүд нийлж фейсбүүк группийн хүрээнд судалгаа явуулахаар болсон. Судалгаагаар сарын орлого нь 3.5 сая төгрөгт хүрээгүй өрх хүүхдийн мөнгөнөөс хасагдсан жишээ олон байна. Ямар шалгуураар хүүхдийн мөнгөнөөс хасагдсаныг ихэнх эцэг эхүүд ойлгохгүй байна гэж хариулсан. Мөн судалгаанд хамрагдсан ээжүүдийн 60-70 хувь нь бага насны 1-2 хүүхэдтэй, ипотекийн зээл төлдөг өрхүүд байгаа юм. Эдгээр өрхүүд сард 300 мянган төгрөгөөс нэг сая төгрөг хүртэл зээл төлдөг төрийн албан хаагчид байна. Гэтэл төр засгаас ямар үзүүлэлт, шалгуураар зарим өрхийг хүүхдийн мөнгөнөөс хасаж байгааг тайлбарлаж чадахгүй байгаа юм. Ингэж алагчилж үзсэний үр дүнд хүүхдийн мөнгөнөөс 135 сая тэрбум төгрөг хэмнэж байгаа гэсэн. Тэгвэл бид энэ мөнгө эргээд хүүхдэдээ зориулна гэж найдаж байгаа.
Түүнчлэн надад маш олон ээжүүд хандсан. Энэ дундаас 18 нас хүрээгүй хүүхдэд дүүгийнх нь мөнгийг олгосон гэх жишээ байна. Зарим ээжийн хэлж байгаагаар өрхийн бүртгэл дээр алдаа гарсан. Гэтэл төр засаг алдаатай мэдээлэлд үндэслэн хүүхдийн мөнгийг олгож эхлээд байгаа. Иймд бүртгэлийг засах ёстой. Энэ жилдээ бүх хүүхдэд хүүхдийн мөнгийг олгох хэрэгтэй. Энэхүү шаардлагыг 4000 гаруй ээжүүдийн төлөөлөл засгийн газарт хүргүүлсэн. Гэвч одоо хүртэл хариу ирээгүй байна" гэлээ.