Хуучин орон сууцны үнийн өсөлт 12.4 хувьтай гарлаа. Оны эхний сард Улаанбаатар хотод орон сууцны үнийн индекс 1.13 нэгж болж өмнөх оны мөн үеэс 12.7 хувиар өссөнийг Үндэсний статистикийн хороо мэдээллээ.
Үүнд шинэ орон сууцны үнэ 13.2 хувиар өссөн нь гол нөлөө үзүүлсэн байна. Харин хуучин орон сууцны үнийн өсөлт 12.4 хувьтай гарчээ. Орон сууцны үнийн индекс сүүлийн дөрвөн сар дараалан өсөх чиг хандлагаа хадгалж байгаа ч жилийн дүнгээр өсөлтийн хурд нь харьцангуй саарсан байна.
Нэгдүгээр сард шинэ орон сууцны талбайн дундаж үнэ 3.5 сая төгрөг байгаагаас Хан-Уул дүүрэгт хамгийн өндөр буюу 3.8 сая төгрөгийн ханштай байгаа юм. Үүнийг өмнөх саруудтай харьцуулахад сүүлийн хоёр сар дараалан өсөх чиглэлд хадгалагдаж байна.
Хуучин орон сууцны дундаж үнэ нэг м.кв нь 3.3 сая төгрөг байгаагаас Сүхбаатар дүүрэгт хамгийн өндөр буюу 4.07 сая төгрөгийн ханштай байна. Өөрөөр хэлбэл Улаанбаатар хотын хамгийн үнэтэй байршил нь Сүхбаатар дүүрэг дэх хуучин орон сууцууд байгааг Үндэсний статистикийн хорооны мэдээлэлд дурджээ.