
Нидерландын одон орон, газар хөдлөлт судлаач Фрэнк Хүгербетс Турк, Сирийн газар нутгийг хамарсан хүчтэй газар хөдлөлтийг хэд хоногийн өмнөөс таамаглажээ. Тодруулбал хоёрдугаар сарын гуравны өдөр өөрийн твиттер хуудсандаа тэрээр “Эрт, орой хэзээ нэгэн цагт Туркийн өмнөд хэсэг, Йордан, Сири, Ливан улсууд оршдог бүс нутагт 7.5 магнитудын хүчтэй газар хөдлөлт болно” хэмээн бичсэн байна.
Одон орны геометр, тэр дундаа сарны геометрийг газар хөдлөлтийн мэдээлэл, давтамжтай нь харьцуулан судалж хүчтэй газар хөдлөлтийг урьдаас таамаглах боломжтой гэж тэрээр үздэг аж. Энэ талаарх судалгааг тэрээр сүүлийн есөн жилийн турш хийж байгаа аж. Түүний таамаг биелэлээ олж Туркийн өмнөд хэсэг, Сирийн хойд хэсгийн хил залгаа бүс нутагт 7,8 магнитудын хүчтэй газар хөдлөлт болсонтой холбогдуулан твиттер хуудасны хандалт нь огцом нэмэгдсэн байна.
Түүнчлэн нэрийг нь барьсан хуурамч аккаунт үүсгэн, хүчтэй газар хөдлөлт болно гэж хуурамч таамаг дэвшүүлсэн тохиолдол ч гарчээ.
Фрэнк Хүгербетс 4300 орчим хүний амь насыг авч одоод байгаа газар хөдлөлтийн дараа Твиттер хуудсаараа дамжуулан гамшигт амь үрэгдсэн хүмүүсийн араас гүнээ гашуудаж байгаагаа илэрхийлсэн байна.
Харин түүний таамаглалд гүн автахгүй байхыг салбарын зарим мэргэжилтнүүд уриалжээ. Газар хөдлөлт нь гаригуудын байршлаас шалтгаалдаггүй бөгөөд газар хөдлөлтийг урьдчилан таамаглах шинжлэх ухааны арга байдаггүй гэдгийг мэргэжилтнүүд хэлж буй.
