ОХУ хөнгөн цагааны үйлдвэрлэлээр дэлхийд хоёрдугаарт бичигддэг
АНУ энэ долоо хоногийн эцсээр ОХУ-ын хөнгөн цагааны экспортод 200 хувийн тариф тогтоохоор төлөвлөж байна. Хэдий тийм боловч одоогоор АНУ-ын Ерөнхийлөгч Жо Байден хараахан албан ёсны зөвшөөрөл өгөөгүй байгааг эх сурвалж мэдээллээ.
ОХУ Украинд халдаад нэг жил орчим болж байгаа бөгөөд АНУ Москвад шахалт үзүүлэх шинэ алхмуудын нэг болж байна гэж харж болохоор байна.
ОХУ хөнгөн цагааны үйлдвэрлэлээр дэлхийд хоёрдугаарт буюу БНХАУ-ын араас бичигддэг. АНУ-ын хөнгөн цагааны нийт импортын 10 хувийг ОХУ бүрдүүлж байгаа юм. Энэхүү тариф хэрэгжиж эхэлбэл АНУ-ын ОХУ-аас импортлох хөнгөн цагааны хэмжээ огцом буурах төлөвтэй байгаа аж.
Улс орнуудын эдийн засгийн өсөлт саарч, БНХАУ цар тахлын тархалтын улмаас хөл хорио тогтоосноор хөнгөн цагааны үнэ өнгөрсөн онд 15 орчим хувиар унаад байлаа. АНУ-ын ОХУ-аас импортлох хөнгөн цагааны хэмжээ өнгөрсөн оны аравдугаар сард бараг “тэг” болж буураад байсан бол 11 дүгээр сард 11 мянга 600 тонн болж эргэн сэргээд байна.