Украины Ерөнхийлөгч Владимир Зеленский өчигдөр орой хэлсэн үгэндээ Орос улс хоёрдугаар сард болох шинэ том хэмжээний довтолгоонд бэлдэж байна гэж мэдэгджээ. Энэ мэдээллийг Британийн "Файнэншл таймс" сонин Украины тагнуулын албанаас иш татан мөн баталж байна.
"Эзлэн түрэмгийлэгчид 2-р сард ямар нэгэн зүйл хийхийг хүсч байна гэсэн олон мэдээлэл аль хэдийн гараад байна" гэж Зеленский хэлээд "Өнгөрсөн жилийн ялагдлаа эргүүлэн авахыг хичээж фронтын янз бүрийн чиглэл болон мэдээллийн орон зайд дарамт шахалтаа нэмэгдүүлж байгааг харж байна" гэж онцолжээ.
"FinancialTimes"-ийн мэдээлснээр, Украины армийн цэргийн зөвлөх "Оросын цэргүүдийн ойрын 10 хоногийн дотор довтлох ажиллагаа явуулах тухай "маш найдвартай тагнуулын мэдээлэл" Киевт ирсэн гэж мэдэгджээ.
Баруун Луганск муж, тухайлбал, өнгөрсөн намар Украины арми хяналтандаа авсан Кременная болон Лиман хотын ойролцоох бүс нутаг Оросын армийн шинэ довтолгоо хийх магадлалтай чиглэл болж магадгүй гэсэн шинжээчдийн таамаглалыг иш татан бичжээ. Эдгээр газуудад Орос хэдэн долоо хоногийн турш цэргийн хүчээ төвлөрүүлж байгаа гэдгийг онцолсон байна.
Москва мөн Донецк мужийн өмнөд хэсэгт цэргээ татаж, ялангуяа хавар Орост эзлэгдсэн Мариуполь хотын ойролцоох тосгонд олон анги нэгтгэлээ илгээж байна.
"Файнэншл таймс" сонин Украины цэргийн тагнуулын төлөөлөгч Андрей Чернякийн "Киев Пост" сонинд өгсөн ярилцлагаас иш татан ОХУ-ын Ерөнхийлөгч Владимир Путин цэргүүддээ Донецк, Луганск мужуудыг гуравдугаар сар гэхэд бүрэн эзлэхийг тушаасан гэжээ.
Эх сурвалж: ВВС