Шинжилгээний бүхээгүүдийг байрлуулах нийт зардал ойролцоогоор 200 тэрбум юань буюу 30.1 тэрбум ам.доллар хүрчээ.
БНХАУ COVID-19-ийг Үл тэвчих бодлогоо дуусгавар болгосноор иргэдэд багадаа 15 минут алхах зайд байхаар байрлуулсан Covid-19-ийн шинжилгээний бүхээгүүд орон даяар хэдэн арван мянгаараа “эзэнгүй” орхигдоод байна. Эдгээр “Бүхээгийг хэрхвэл зохилтой вэ” гэдэгт БНХАУ-ын хотууд толгойгоо гашилгаад байгаа аж.
Заримыг нь буулган салгаж хаягдал төмрийн цэг рүү ачсан бол нэгээхэн хэсэг нь дахин ашиглах түүхий эдийн цахим зах дээр хямд үнээр зарагдаж байна. Харин зарим нь гудамжинд зүгээр л хог болон үлджээ.
Хэд хэдэн бүс нутгийн засаг захиргаа, оршин суугчид хамтдаа эдгээр бүхээгүүдийг шинээр ашиглах бүтээлч санааг бодож олсон байна.
Хязгаарлалтууд цуцлагдсан 12 дугаар сард Шэньжэнь, Чанша зэрэг хот шинжилгээний бүхээгийг халуун хэмжих, эм түгээх цэг болгон ашигласнаар эмнэлгийн ачааллыг бууруулж байлаа.
Шинжилгээний бүхээгүүдийг байрлуулах нийт зардал ойролцоогоор 200 тэрбум юань буюу 30.1 тэрбум ам.доллар хүрсэн нь Монгол Улсын дотоодын нийт бүтээгдэхүүнээс хоёр дахин өндөр дүн юм.
Covid-19-ийн тархалттай тэмцэхэд гарсан асар өндөр өртөг нь эдийн засгийн удаашралтай зэрэгцээд БНХАУ-ын засаг захиргааны нэгжүүдэд ихээхэн хэмжээний өрийн дарамт үүссэн аж. Харин энэхүү бүхээгүүдийг дахин эргэлтэд оруулснаар хотууд зарим зардлаа нөхөх боломжтой болсон байна.
Шанхайгаас баруун тийш 100 км-т орших Сужоу хот гэхэд л шинжилгээний бүхээгийг дахин ашиглах талд бусдаасаа илүү шинэлэг санаачилга гаргажээ. Хотын захиргаа Сар шинийн баярын худалдаанд зориулан 30 орчим хоосон бүхээгийг бизнес эрхлэгчдэд үнэгүй олгож хүнс, бэлэг дурсгал, нутгийн амттан худалдаалах мухлаг болгон ажиллуулсан байна. Тэдгээр мухлагуудыг цаашид ч мөн худалдаачид ашиглаж аялал жуулчлал, худалдан авалтыг нэмэгдүүлэхэд дэм үзүүлнэ хэмээн тус дүүргийн албан эх сурвалж онцолжээ.
Сужоу хотын бусад хэсэгт шинжилгээний бүхээг номын сан болон хувирч оршин суугчдад ном унших, ном хандивлах боломжийг олгож байгаа аж. Өөр хэсэгт бүхээгүүд тохижилт үйлчилгээ, цэвэрлэгээний ажилтнуудад зориулсан ус буцалгагч, богино долгионы зуух бүхий амрах цэг болжээ. Түүнчлэн цөөн хэд нь галын онцгой үед аюулгүй байдлыг хангах багаж төхөөрөмж агуулсан цэг болсон байна.
Харин хотын төмөр замын буудлын гадна талд Хүний нөөц, нийгмийн хамгааллын товчооны ажилтнууд эгнэсэн бүхээгүүдэд суун цагаач ажилтнуудад хөдөлмөр эрхлэлтийн зөвлөгөө өгөх аж.
Өрийн дарамтад байгаа зарим бүс нутгууд хаягдмал шинжилгээний бүхээгүүдэд хөрөнгө оруулахдаа цааргалж мэдэх л юм хэмээн Seton Hall их сургуулийн профессор Хуан Яньжун онцолж байлаа. Хэдий тийм боловч зарим чухал үйлчилгээнүүдэд ачаалал их байгаа тохиолдолд шинжилгээний бүхээгүүдийг хувирган ашиглах санаачилгууд ч гарч ирэх боломжтой хэмээн тэрбээр дурдав.
Одоогоор БНХАУ-ын орон нутгийн засаг захиргаа Covid-19-ийн үлдээсэн ул мөрийг бүрэн арилгах үзэл суртлын шинэ зорилтын хүрээнд шинжилгээний бүхээгүүдийг ийнхүү идэвхийлэн шинэчилж байна.
