ЦЕГ-аас Санхүүгийн зохицуулах хороотой хамтран койн, крипто вальюттай холбоотой цаг үеийн асуудлаар мэдээлэл хийлээ.
Эрүүгийн цагдаагийн албаны Эдийн засгийн гэмт хэрэгтэй тэмцэх газрын Мөнгө угаах гэмт хэрэгтэй тэмцэх хэлтсийн дарга н.Сэргэлэнбаатар энэ үеэр "Өнгөрсөн долоо хоногт нийт 468 хэрэг шалгагдаж байсан бөгөөд 4 иргэн нь виртуал хөрөнгө гаргаж, иргэдээс хөрөнгө татан төвлөрүүлсэн этгээдүүдтэй холбоотой хэрэг байсан. Тэгвэл өнөөдрийн байдлаар хөрөнгө татан төвлөрүүлсэн иргэдийн тоо 7 болж нэмэгдэж, нийт 471 хэрэг шалгагдаж байна.
Эдгээр хэргийн 385 буюу 82 хувь нь дотоодын, 86 нь гадаадын крипто вальюттай холбоотой хэрэг байна. Үүний дийлэнх нь иргэд бусдад залилуулах юм уу нууц үгээ алдаад койн, крипто вальютаа алдсэн хэргүүд байна.
Монгол Улсад нийт 64 койныг гаргаж, хөрөнгө татан төвлөрүүлсэн бүх этгээдүүдийг цагдаагийн байгууллагаас мөрдөн шалгах ажиллагааг явуулж байна. Иргэдээс ирүүлсэн гомдол мэдээллийн хүрээнд мөрдөн шалгах ажиллагаанууд явагдаж байна.
Мөн ЦЕГ, Санхүүгийн зохицуулах хороотой хамтарсан ажлыг хэсгийг байгуулж, койн гаргасан дээрх 64 этгээд хөрөнгийг хэрхэн татан төвлөрүүлсэн, хэрхэн зарцуулсан, үүнтэй холбоотой хууль тогтоомж зөрчсөн асуудал байна уу гэдгийг шалгаж байна. Гадаадын бирж рүү алдсан байсан 700 сая орчим төгрөгийн крипто валютыг эргүүлэн татаж, хохирлыг барагдуулсан" хэмээлээ.